A Enrestida unatra añada puesto de trobada y dinamizazión en os Pilars

Como en as zagueras añadas a chen de A Enrestida ha quiesto que o suyo zentro sozial estase punto importán y de trobada en os Pilars de Zaragoza. Una serie d’autibidaz d’os clamaus "Pilars disidens", os charrazos entre amigos con nuebos proyeutos, autuazions improbisadas y puesto d’acullida ta ixa chen de difera que surte de Zaragoza con atra imachen d’a que i dentró.

O primer cabo semana a chen embrecada en o pasabillas, organizau por segunda añada por A Enrestida, y a que fazió parti d’a manifestazión independentista bendrían a aprofeitar y disfrutar de l’ambién que se i creyó. No serían os unicos diyas, pero en o preto d’os Pilars de 2006 s’eba combocau una fiesta en a carrera que a plebia s’encargaría d’auguar.

Con tot y con ixo a borina continaría a lo largo de toda la semana, un ambién no comerzial, una alternatiba ta la chen que gosamos bibir por a Madalena y una opzión, tanto mosical como de puesto, diferén a o borreguismo fiestero de puestos como Interpeñas u, estiaño con l’anunziau desfile comerzial de mosica eleutronica en o meyo d’o Paseu Independenzia. Ixa mena de fiestas ye la que quieren que tiengamos, nusatros siempre miraremos de que isto no pase. As nuestras fiestas serán como nusatros queramos. Tanimientres prebaremos d’empentar a mosica combatiba, poder fer serbir as luengas minoritarias (más que más l’aragonés), fer plegar ta la chen as nuebas campañas y mensaches, y en a mida d’o posible promozionar a mosica popular y en direuto.

Asinas i pasó o diya 13 cuan una colla improbisada de donzainers, tamboril y albokari se chuntón ta fer uno d’os millors rezitals que se pueden beyer en istos intes en Aragón. A ista audizión pertenexen as fotos que podemos beyer abaxo y alto, asperemos poder fer-ne más y que en os Pilars siempre bi aiga una alternatiba. Muitas grazias a toz os que tos pasez en as fiestas por A Enrestida.