Ganador II Concurso de relatos en Aragonés A Enrestida. Diago Lezaun Romero

A Carrachina

A carrachina yera morada, d'a grandaria d'una mazana y dózil y miziosa como un mixín. Bibiba en a serbilla d'embutíus d'a nebera. Tota la familia adorabanos á la carrachina. A mía mai ubriba la nebera y le'n feba la rialleta á la carrachina. A mía chirmana no quereba marchar ta escuela sin dar-le un pochonet. 

O diya que se morió a carrachina estió un trauma ta toz. O mío pai prenzipió á zorrupar, a mía mai demandó l'esburzie, a mía chirmana se pencho d'o caballo y yo comenzipié á escribir.

A choliba

Cuan salié d'a UCI dimpués de güeito diyas en coma en primeras no fablaba. O mío tozuelo feba o suyo papel alto u baxo, talmén más suenio que de cutio, cosa más. Ana y a resta no sabeban güaire, que m'eba saliu d'a carretera cuan tornaba de fer clase en Albalate, que yera de nueis y que yera de dar que m'ese adormiu una miqueta, chusto lo que caleba ta continar dreito en una curba á man cucha. No fablaba por ixo, ta no crebar a normaildá y bier l'azidén como cualsiquier atro azidén. Un más dentre os zinco que bi ha á la semana en a prebinzia de Teruel (encara yera en o trampo de teruel, yera termino monezipal d'Albalate, no pas de Lezera). O caso yera que a nuei de l'azidén, cuan plegaba de salir d'Albalate, sería la meya ta las onze, biyé á o canto d'a carretera una choliba en o guldrón, que no se mobeba mica pero yera de piet. Ature l'auto y m'amané á la choliba. Como no bieba pon remero que fazié ta zaga l'auto ta aprofeitar a luz d'os faros. A choliba me se miraba fito-fito con güellos de choliba, grans y foscos. pensé en lebar-la ta un zentro de remontadura d'abes que bi ha en l'alfranca, porque yera esclatero que l'animal no yera bien de tot.  La replegué y la posé en o posiento d'o copiloto, redolié l'auto y me posé en o de yo. Salié atra begada ta debán, endrezera Zaragoza, Madalena, cortesías, o mío leito. Lebaba zinco menutos adugando cuan a choliba fablo. Fablo con boz grau, panda, cuasi de biello, con azento lezerino  "Paece quaun s'ha quedau buena noche". Remero mirar-me-la y trobar-me os suyos güellos en ringlera con os míos. Dimpués d'ixo, no remero güaire más, son de ferralla, un trucazo en o tozuelo, silenzio. Me boi á atribir. Me soi atribindo. Lo foi, amenisto saber-ne:  

 - Bi eba una choliba en l'auto?. Sabez?.- Me se miran toz fito-fito, güellos de choliba, encara no eba ubierto a boca, me preguntaban y no respondeba, dica agora. Me xorronté. Me metié á plorar. Ana tamién ploró. Pensaba que yera barrenau, que no tornaría á estar yo. Yo lo teneba esclatero. 

A granota

Cuan a granota plegó ta casa suya yera escruxinada por o diya de treballo. 

Puyó amoniquet os trangos d'a escalera y sospiró antis d'escar as claus en a pocha. 

Asinas no podeba continar y lo sabeba.  Se yera dixando a pelleta y total ta cosa, en cualsiquier inte se podeba trobar en a ringlera de l'ature, con a güeña d'achuste que l'eban feito fa tres añadas, esbiellau tres begadas y sin perspeutiba d'amillorar ni un siñal.  Antimás, en o nenufar an que le pertocaban ista semana y a benién no trobaba la postura y le yera prenzipiando á fer mal a espalda, sabeba que ta o biernes iba á estar un infierno. 

L'unico que l'aconortaba una mica yera fer-se, de cabo cuan,  un gotet de ron antis de marchar ta o leito. O problema yera que cada begada yera menos de cabo cuan y más cada nuei. Encara no eba parau cuenta, pero fa tres meses que yera un costumbre, en cuenta d'un luxo.  

O diya siguién estió lo primer que desayunó ron y plegó una mica capina á o treballo.

Tres semanas dimpués yera en l'ature. 

Por astí pasa bella begada trucando á os timbres ta bier si le dan bella perra. Á yo m'alticama. Como ye berda y chicota bel diya la ban á pisar.

Diago Lezaun Romero