Omenache a Manuel, o comandante "Cura Pérez"
A tardi d’o Chuebes yera a segunda d’as II Chornadas internazionalistas que A Enrestida organiza toz os años por istas calendatas. Estiaño charraríanos d’un país conflitibo, Colombia, pero pleno de rasmia de muita chen que quiere rematar con sieglos de represión y fambre por meyo de guerrilas de mui diferens menas. En Aragón a situazión d’iste país latinoamericano ye seguida fito-fito por un comité de solidaridat, más que más con o ELN y seguindo a trayectoria d’un d’os aragoneses que más ha feito por a reboluzión y a luita por un mundo más chusto, o cura "Manuel Pérez". A chen que asistiemos a o Z.S.A. A Enrestida podeimos beyer una zinta en que se resumiba a bida d’iste aragonés de Alfamén, dende que se ordenó mosén dica que murió en a selba colombiana omenacheau por meyo millar de combatiens de l’ELN. El plegó a dirichir ista guerrilla colombiana dende 1973 dica la suya muerte en 1998 y, como podiemos beyer en a zinta, representó una d’as corriens sozialistas que siempre se miró de chuntar a todas as guerrillas de Colombia a treballar en un fren común por a chustizia y a dignidat. Dimpués de pasar por a Republica Dominicana sería expulsau d’a suya parroquia de Colombia por a Ilesia debiu a la suya umildat y dedicazión a la pobreza. Tot isto le fería rematar en a guerrilla, pero con tot y con ixo a Ilesia nunca no ha dito cosa sobre a suya expulsión. Dimpués de bella meya ora de zinta prenzipió una rufierta y una chiqueta charrada d’a cabeza bisible d’o Comité de Solidaridat con Colombia. Pero lo importán d’a rufierta estió en a oportunidat que teniemos de charrar con o chirmán d’o "Comandante Pérez" y autual alcalde d’Alfamén por o PSOE, antimás d’uno d’os millors amigos de Manuel. Todas istas carauteristicas que plego de comentar nos ferían onra ta prenzipiar una rufierta sobre como beyeba a chen d’o suyo lugar a endrezera que eba trigau Manuel Pérez en a suya bida. Más que más parando cuenta con que o ELN eba estau declarau dimpués d’o 11S como una colla terrorista por os EEUU, pero ixo no yera nuebo. O suyo chirmán nos contaría como él fue a beyer-lo ta la selba colombiana y bi paró cuenta por o que yera luitando "Manolo". Por ixas calendatas mesmo plegón a estar 7 añadas sin saber cosa d’él y as notizias que plegaban d’allí plegón a dar-li por muerto,… muitas bibenzias en una tardi que prenzipiemos a entender a situazión de Colombia aduyaus por as esplicazions d’a chen d’o "Comité" y que de seguras que da muito más que charrar en as tardis qu’en quedan.
1 comentario
juan david perdomo perez -