O refuse no atura

Encara no ebanos charrau guaire sobre iste tema pero, a l’igual que en muitas atras ziudaz d’o mundo, en Zaragoza se bienen fendo conzentrazions en refirme a o pueblo de Libano y Palestino todas as semanas.

Dende que prenzipiasen os bombardeos y os trucazos d’Israel contra la poblazión zibil de Libano toz os martes i hai una fita con l’internazionalismo solidario en a plaza d’España de Zaragoza a’l canto de l’edifizio d’a Deputazión Probinzial de Zaragoza. Encara que no son buenas calendatas ta estar perén en a tuya ziudat, l’asistenzia de chen podríanos dizir que ye cuasi masiba toz os martes a ixo d’as güeito d’a tardi. Chen de cuasi toz os coleutibos alternatibos de Zaragoza y mesmo bels politicos se i pasan a ormino. O mesmo 22 d’Agosto en plenas bacanzas de berano se tornón a comobacar-ie zentenars de personas ta denunziar "l’afán expansionista de l’Estau d’Israel". L’auto como toz os que emos puesto acudir a lo largo d’o mes de Chulio y Agosto estió combocau por o Foro Palestina Libre de Zaragoza, os cuals reclaman, como no puede estar d’atra traza, "a restituzión inmediata de l’integridat d’o territorio libanés y a suya soberanía nazional" asinas como que Israel apañe de tot a esferra que a probocau en Libano, tanto a ran personal en a suya poblazión como a ran material en todas as poblazions y carreteras en que s’han feito os suyas enrestidas.

A chen que emos puesto asistir-ie emos bisto a tristeza y a rabia con que biben ista situazión a chen que bibe en Aragón pero que tiene a la suya familia bibindo en Palestina u Libano. Familias y fillos mui chicoz que dende a suya curta edat ya entienden como y dende an se nabega iste mundo. A diferenzia entre bibir en un Estau rico d’os que controlan tot o poder y bibir en un Estau pobre y estar controlau, a begadas, como o caso de Palestina sin nian sisquiera tener un Estau reconoxiu por atros países. Os ninos y a chen palestina que plorando reclamaban a fin d’as enrestidas israelís no reblarán en fer beyer a o mundo a inchustizia que astí se ye cometendo, ellos tienen suerte de no bibir-ie pero saben mui bien a suya reyalidat.

Todas istas autuazions no son nuebas en Zaragoza, encara que sí agora se fan más asobén y con más chen. O Foro Palestina Libre leba añadas remerando a situazión de pobreza y acoso a la que Israel ye sometendo a Palestina. Mediante biaches y contautos nos trayen informazión d’a berdat y de bez sirben d’aduya a la chen palestina que bibe en Zaragoza.