As condenas d’a ipocresía

O zaguer mes de Chulio podiemos beyer en o parlamento europeyo una d’as más zinicas y ipocritas autuazions d’a ultradreita españolista. Os que dizen estar en contra d’o terrorismo y d’a supuesta manca de libertat, que ellos esparden, ebitón y no condenón l’alzamiento y a ditadura franquista en o suyo 70 cabo d’año. Toz os grupos politicos espresón o refuse y condenazión d’ista mena de terrorismo a eszepzión d’o representán d’o PP europeo Jaime Mayor Oreja y l’ultradreitista polaco Maciej Gyertich d’a "Liga de las Familias Polacas".

Ye paradochico beyer como cuan plegaba la parola, a o exministro d’interior y excandidato a Lehendakari, no fese garra referenzia a 1936 ni a o franquismo y sí a os que seguntes él amenazan a "concordia entre os españols". Cuantas begadas abremos sentiu surtir d’a suya boca que os que no condenan os autos terroristas son tamién terroristas, ….

A la chen que ya no se nos fa raro istas cosas continamos querendo trucar o ficazio d’as ferramientas que fazión desembolicar a guerra en tan fatidica calendata, os poders que o polaco "Maciej Gyertich" tornaría a nombrar en o suyo discurso: "Grazias a la Ilesia, l’exerzito y Franco, a enrestida contra a España catolica se podió superar".

Lochicamén a rispuesta d’os que sufren a represión cutiana d’os franquistas no se fazió asperar. Oras dimpués de saber-se a notizia representans de partius ilegalizaus por a "Lei de Partius", empentadas entre atros por Mayor Oreja, demandaban l’aplicazión d’ista lei a o PP por no condenar o franquismo. "Dengún puede fer más apología d’a bioleniza que qui sostiene que una dictadura faxista y asesina, como la de Franco, tenió chustificazión istorica"; a ditadura que seguntes Bronislaw Geremek (Liga liberal polaca) s’imponió en contra d’a libertat, a democrazia y l’Estau de dreito (¿tos sona?) y alpartó a l’Estau español 50 añadas d’Europa.

No ye l’unico puesto an que Chulio dixó entrebeyer as ipocritas condenas d’a biolenzia que dizen encabezar o PP. Y ye que en una entrebista feita a "Aznar" en a BBC dixó esclatera a suya opinión de que a OTAN bombardiase Libano como respuesta a Hezbolá si Israel estase miembro de l’Alianza Atlancia, como esfiende en a suya proposa de reforma d’a organizazión multilateral que empenta dende fa meses en diferens istanzias internaizonals. Como siempre, paix que as unicas bitimas d’o mundo son as que diz encabezar dende o suyo partiu y as organizazions que ha creyau: Basta Ya!, Foro Ermua, AVT,… como si os ya mils de zibils muertos en Libano y Palestina, a poblazión democratica republicana masacrada en o golpe franquista, as bitimas de Madrit de l’11-M,… estasen bitimas de segunda.