"Nafarroa Oinez" y "L'aragonés en a carrera" dos fiestas chirmanas

 

O prosimo sabado 6 d’Otubre tendremos a enchaquia de poder sentir y beyer dos d’as fiestas más antigas y rebindicatibas en pro d’as luengas minoritarias de l’Estau. A partir d’as 6 d’a tardi, en o Zentro Sozial A Enrestida (callizo San Cristóbal) conoxeremos un poquet más d’a fiesta d’as Ikastolas Nabarras “Nafarroa Oinez” y a fiesta de “L’aragonés en a carrera”. A una con más de 25 añadas dezaga aduyando a finanziar y socializar l’euskara en Nabarra; l’atra en l’año d’o suyo 25 cabo d’año, como Ligallo de Fablans, amostrando aragonés en Zaragoza y Aragón.I contaremos con a presenzia de Peio Mariñelarena, director d’a Federación d’Ikastolas de Nabarra, y Chan Baos como representán d’a Federación de Ligallos de Fablans por l’aragonés y uno d’os representans d’ista asoziazión con más añadas d’experienzia.

I beyeremos fotos, bella zinta y más que más experienzias que asperemos que contribuigan a fortalezer istas dos fiestas que tienen muito que amostrar.

 

Abrazo a l'Ebro iste sabado 15

O millor d’o hardcore euskaldún en Hondarribia

O biernes 7 podiemos asistir a uno d’os conziertos más esperaus d’o cabo berano. En meyo d’as fiestas d’o lugar; o puesto yera Hondarribia, un lugar d’o que ya emos charrau en atros articlos y cuyo prenzipal intrés, antiparti d'o polidismo lugar en a bahía d'o Txingudi, ye a cantidat de collas de hardcore que en surten y en han surtiu. Estiaño o siello “Psilocybe” tornaba a montar conziertos, d’una traza alternatiba a la programazión ofizial, fendo serbir un eszenario propio a’l canto d’as txoznas . Ta la chen que desconoxca ista mena de siellos mosicals dizir que surtió como una respuesta independién a la manca de refirmes y cobertura ta la cantidat de bandas que ban surtindo en Hondarribia y Euskal Herria, muitas d’ellas chicorronas. A propuesta ye esclatera y o suyo treballo ya se dixa beyer con bels prochectos d’apaño de locals ta ensayo, sala de conziertos,  programazions d’actuazions, discos,… siempre con o lema de “Mercau libre” por debán de tot.

As collas encargadas de tañer-ie yeran de sobras conoxidas por os asistens. Lisabö que feba poco eban sacau un disco autoproduziu, una d’as collas punteras en o hardcore d’a ripera d’o Bidasoa, con una puesta en eszena y un directo que fa tremolar o esmo de bez que o tuyo cuerpo.

A segunda colla yera ya un clasico d’os eszenarios hardocores que tamién feba poco eban sacau disco nuebo, ista begada sí, produziu por o siello “Psilocybe”. Un ritmo más lento que en os zaguers discos, pero de bez más denso y arroclador.

Cantas en un eskera con un platero sentiu rebindicatibo; una canta dedicada a “Nafarroa”, tot un chilo pleno d’intenzions en un lugar como Hondarribia que fue o puerto de l’antigo Reino de Navarra, cuna de l’actual Euskal Herria: “gu gerade Nafarroa” (en o dialecto nafarrera nusotros somos Nabarra).

A fiesta remató luego, malas que remató o conzierto. O diya benién sería o turno de tradizions mui luens d’o rock’n roll, y que en a mía opinión fan mala aduya a la combibenzia. O “Alarde” de Hondarribia, an que partizipan más de meya población,  ye añada par d’atra orichen de muitos conflictos que uno ya no sabe ni de an bienen.

L'asturiano empenta

O berano da ta muito, y una d’as cosas que se pueden fer ye biachar y conoxer a reyalidat d’atros países, muitas begadas amagadas por a maquinaria de l’Estau. Ista begada fuemos ta Asturias, un país chirmán a o nuestro con una d’as luengas más parexidas a la nuestra que nos podemos trobar en l’Estau, más que más por l’emplego cutiano d’o caracteristico berbo “ser” en a suya terzera persona, pero tamién por atros muitos rasgos d’o lexico.

Podríanos dizir que a situazión legal de l’asturiano ye un trango por debán de l’aragonés, debiu a o suyo reconoximiento y empente por parte d’o gobierno; pero en a mesma situazión de alegalidat ya que encara no goza d’un status de coofizialidat como le cal a cualsiquier luenga minorizada de l’Estau español.

A situazión sozial tamién diremos que ye por debán de l’aragonés ya que en a practica totalidat d’Asturias ye reconoxiu sin bergüeña como a segunda luenga d’Asturias, sino a primera, cuasi tot lo mundo la entiende y fan un poder por emplegar-la siempre; encara que muitas begadas entiendan por fablar asturiano dizir “ye”, fer as rematanzas de “as” en “es” y bel cambeo de posizión d’os pronombre arredol d’o berbo. Con tot y con ixo te truca o ficazio sentir a bitalidat que tienen toz istos rasgos en ziudaz tan grans como Ovieu u as industrials Xixón y Avilés.

A foto que tos meto perteneix a o concurso de canta asturiana en o preto d’o casco biello de Xixón, un domingo de metat de berano. O curioso no ye que se i zelebre o concurso de canto, que a begadas me remeraba muito a las xotas en a plaza d’o Pilar; sino que entre canta y canta bi eba representazions de teyatro comico asturiano y en asturiano, con recreyazions de situazions cutianas entre personaches. A plaza yera plena a rebutir y a chen se i sentiban identificaus con o parlache, esmelicando-se y fendo asabelo de comentarios.

Nueba etapa ta o prozeso irlandés

Ista semana o Gubierno británico remató a clamada “Operazión Siñal”, lo que quiere dizir que a suya “campaña melitar” en o norte d’Irlanda ha rematau, y seguntes lo que dizió o suyo menistro de Fuerzas Armadas, Bob Ainsworth, puede “significar o prenzipio d’una nueba era”. En reyalidat no ye que se’n baigan todas as fuerzas d’ocupazión británicas pero si que ye un trango. De los bels bente mil soldaus britanicos que ocupaban os seis condaus d’a probinzia de l’Ulster antis de l’alto o fuego de l’IRA en 1994, se pasará a bels zinco mil, con lo que encara se podrán beyer soldaus britanicos en catorce lugars. Con tot y con ixo, a desaparizión d’a torres melitars de “South Armagah” y a desaparizión de bellas bases de l’exerzito son enchaquias esclateras d’o prozeso de paz.

Tamién i hai bels aspectos positibos arredol d’as “enrestida de castigo”, que contrimuestran a credibilidat d’o prozeso. Istas “enrestidas” yeran actos feitos por organizazions armadas, tanto “republicanas” como “leyalistas”, que feban o papel de “polizía local”. Cadaguna en os suyos bicos, os republicanos se miraban de no reconoxer a seguridat británica, que antimás yera ineficaz de tot en o preto d’istos bicos. Unas fuerzas armadas que nomás se ocupaban d’exerzer a suya ocupazión y umillar a la poblazión irlandesa diya par d’atro.

Bien pues seguntes un rezién informe, en ista añada, nomás una persona ha rezibiu disparos en ixa mena d’enrestidas, a zifra más baxa dende que prenzipió a nueba fase d’o conflicto, a zaguers d’as añadas sisanta. Beyendo-se que iste deszenso ye empentau por a dezisión de l’IRA y d’a poblazión irlandesa que, agora sí, beye a polizía norirlandesa como unas fuerzas de seguridat plurarls compuestas tanto por caloticos como por protestans.

De todas trazas o nuebo gubierno noirlandés, rezién creyau con paritus d’as dos opzions, contina beyendo como prenzipal reto a situzión economica d’a cuarta probinzia d’Irlanda. O suizidios entre a chobenalla norirlandesa contina estando un común y si no s’esen malfurriau tantos diners en istas campañas melitars britanicas de seguras que seríanos parlando d’atra situazión en l’Ulster.

Ta rematar y como comparanza con a situazión en Aragón, diferen de tot. Dizir que a ocupazión melitar en Aragón ye total, dende Uesca ta Teruel pasando por o terzio d’o suelo monezipal de Zaragoza ocupau por l’Echerzito español. Cuartels y acuertalamientos que tasamén se tienen en pie u i biben dos personas de contino. Muita medrana han de tener por que en pleno sieglo XX a situazión melitar en Aragón ye ta redise-ne.

¿AMOSTRANZA SUPERIOR u DENDE O SUPERIOR?

Isto ye lo que nos abríanos de preguntar cuan beyemos como o mosén Luis Lezama ba presentando una d’as primeras “carreras” ta la unibersidat de San Chorche. Remeremos que a Unibersidat de San Chorche ye a unibersidat pribada d’Aragón que chunto con a Fundazión San Balero leba bels años funzionando y que grazias a o PSOE y o PAR contará en bels meses con una siede bien pincha en Billanueba de Galligo, con todas ixas “carreras” que dende fa bels años demandaba a Unibersidat publica de Zaragoza. A “carrera” será impartida en La Muela, feudo d’a especulazión y por consiguiente d’o PAR, an que les ufrión toda mena d’aduyas ta que se bi instalasén en bels meses en un edifizio zediu. Pero por bels meses se impartirá en o edifizio d’a CAI (como no) de Zaragoza situau en a carrera Alcalde Sáinz de Varanda, siede dica ista añada d’a Unibersidat San Chorche. Tot isto dimpués de que en Zaragoza no les fese mica goi zeder-les a Torre de Santa Engrazia en Mobera. O grupo Lezama ye una interpresa, que ellos claman fundazión sin animo de lucro, endrezada por a Ilesia y con a intenzión de ficar-se en os prinzipals sectors d’as unibersidas pribadas ta impartir-ie carreras d’ostelería. Con tot lo que isto significa y que podemos beyer en atros puestos: matriculas abusibas, creyazión de complexos arredol d’ista, impartizión de materias zegadas por a doctrina d’a Ilesia, replega de subenzions barias, ... y creyazion d’un rete de clientelismo que de seguras que en breus años lo iremos beyendo.Pero lo malo, a tamas de tot isto, ye que un mosén “Luis Lezama” puede en istos tiempos salir en una rueda de prensa con os suyos bestuaches de luto, a presentar garra modalidat d’estudios, ufrindo-los a toda la ziudadanía no confesional y amostrando-se como empentador d’a formazión unibersitaria. Como tos he dito en bels diyas u meses tornaremos a beyer nuebas presentazions de carreras en a Unibersidat Pribada y Fundazión San Balero, de nuebas con a Ilesia arredol suyo y talmén en colaborazión con diferens fundazions y grupos que nomás tienen l’angluzia d’acaparar tot lo poder, adoctrinar y sacar toz diners que puedan destinaus a l’amostranza publica, ta que l’amostranza siga como antismás un dreito d’unos pocos.

 

En Echo en aragonés

Estiaño yera l’onzeno que se feba o PIR, iste festibal que se mira d’arroclar as difirens culturals pirinencas, cada añada en una d’as tres bals Oczidentals d’Aragón. 

O cabo de semana dende o 6 dica o 8 de Chulio preneba as carreras d’Echo ta meter-bi o suyo Mercau d’Artesanía y productos tipicos, pasabillas, actuazions y, prou que sí, borina. No ye que a resta de lugars no tiengan bida, pero en Echo nomás que bi plegas alufras un ambién diferén d’un lugar que tiene bel millar de abitadors y que l’ampla mayoría charran aragonés cheso.

O festibal se desembolicó con muito ambién y chen, os pasabillas enfuelgón as carreras y callizos d’Echo; benius dende oczitania “Boha Qui Pot”, Euskal Herria “Arroitu Indarra” de Roncal y prou que sí d’Aragón, con una d’as millors collas d’animazión meyebal de o momento: “Lurte”.

Tallers de zeramica u percusión tradizional, documental y presentazión sobre Janovas; y muitos conziertos ta bailar y ascuitar. Dende a mía ambista bi destacón os catalans de “La coixinera” que empentón a tot lo Pir a bailar, u “El Kapel” con o suyo mestizache folk-reggea d’o biernes,....

Ta rematar o domingo de tardis un clasico en o PIR, con dos collas que atamás de estar bien conoxidas por toda la chen d’Aragón y d’o PIR continan sorprendendo y esluzernando: La Ronda de Boltaña y la Val d’Echo.

Ista zaguera ye tot un siñal d’argüello y cultura ta la poblazión chesa, y dende o mío punto de bista una colla siñalera de toz as/os que charramos aragonés. Os Pepe Lera y Lagraba’s lideran un colla do l’aragonés cheso ye ferramienta prenzipal, cantas con una letra que charran d’aimor, os dreitos d’a muller muller, triballo u tradizions paganas como as “broxas”. Soi seguro que si ista mesma colla cantase en castellano y d’a birchen d’o Pilar ya l’abrían lebau por tot Aragón como siñal d’a nuestra cultura. Pero no, ixa ye a cruda reyalidat, o desconoximiento de gran parti d’os aragoneses d’una reyalidat sozial que ye platera en lugars como Echo y en un festibal como o PIR. Astí te puedes trobar a artesanos de toda mena que te charrarán en aragonés: benius dende a Sierra de Guara, suministradors de licors d’a propia bal... chen de Chistau que añada par d’atra deziden de besitar l’atras bals menos amanadas d’o Sobrarbe do charran a suya mesma luenga, u mesmo trobar-te de borina a una crica de crapulas chesos con os que te podrás esmelicar en aragonés... y Echo, do pues fablar-le a una zarracatralla de ninos en aragonés sin dengún problema ni sorporesa, do pues mercar cualsiquier cosa en aragonés y do pues beyer uno d’os zaguers puestos an que a trasmisión chenerazional de l’aragonés contina bien biba y os pais fablan a os suyos fillos en aragonés cheso sin garra bergüeña.

29 Chunio A Enrestida. 300 añadas d'ocupazión española en Aragón.

Aragón 1707-2007.

300 añadas dominaus per España

Ista añada 2007 se´n fan 300 d´a incorporazión d´Aragón a o procheuto borbonico español per a fuerza d´as armas y d´a suya desparixión como entidat politica independién. A derrota melitar en a conoixida como Guerra de Suzesión d´os reinos d´Aragón y Valencia debán d´os exerzitos de Felipe V de Castiella y a posterior promulgazión o 29 de chunio d´os “Decretos de Nueva Planta” marcan a esferra d´a identidat nazional d´o pais y a imposizión española a toz os rans que encara sufrimos güe.

 

 

            Istos “Decretos de Nueva Planta” sinnificón a muerte d´Aragón como reino, ye dezir, como chunidat churidico-politica soberana que mientres a suya istoria eba contau con lechislazión y dreito propio (conoixius como Fueros) que regulaban a bida d´o país a toz os libels (zebil, penal, almenistratibo, economico-finanziero..), unas cortes co-lechisladeras chunto a o rai de turno, a Deputazión Cheneral como l´organo que feba efeutibas as dezisions d´as cortes, y churisdizión propia (tribunals) ta chuzgar os conflictos que i esistisen, destacando-ie a fegura d´o Chustizia Mayor d´o Reino como guarenzia d´o cumplimiento d´os Fueros.

 

 

            Felipe V de Borbón aplicó lo Dreito de Conquista sobre os territorios inbadius y benzíus n´a Guerra de Suzesión. Aragón estió sosmeso a las leis, os costumbres, os tribunals y os intreses de Castiella. O Dreito de Conquista implicaba que un estau teneba carta blanca ta organizar d´a traza que creyés más combenién os territorios que conquistaba y sosmeteba, fendo tabla rasa con as instituzions y trazas d´organizazión propias d´ixos territorios. Y ixo se fazió n´Aragón, asinas como en toda la Corona aragonesa. Nomás se rispetó lo dreito zebil aragonés ta regular as relazions inter-personals, dreito que ha permaneixiu dica güe. Tamién se suprimioron as aduanas y o bose d´aranzels, se dixó d´acuñar moneda aragonesa y s´aplicó lo sistema de pesos y medidas castellano, con o que mos podemos fer una ideya de l´afaño uniformizador d´o rei Borbón.

 

 

            O Principat de Catalunya encara resistió dica 1716, año en que tamién l´estioron aplicaus os Decretos. Antiparti, en Catalunya, Valencia y Mallorca se bedó l´emplego d´a luenga catalana en almenistrazión y en os tribunals, cosa que no calió fer en Aragón pos o prozeso de castellanizazión lingüistica d´iste país eba escomenzipiau sieglos antis, con a plegada d´una dinastía castellana a o trono aragonés, os Trastamara,  en l´emponderau per beluns “Compromiso de Caspe”.

 

 

            Fa 300 años Aragón dixó d´estar un país soberano e independién binculau politicamén a Castiella nomás por a fegura d´un mesmo rei -que antimás eba de rispetar os Fueros aragoneses- ta pasar a estar una posesión más d´a monarquía ispanica. Un troz de tierra y a la finitiba una rechión colonizada politicamén, economica y cultural por una nueba “nazión”, España, creyada dende alto, que remata de configurar o suyo tarabidau politico-instituzional un sieglo dimpués en as Cortes de Cadiz que farán a constituzión de 1812.

 

 

            Prou que dende a cucha reboluzionaria no imos a recroxidar unas leis meyebals, una cortes clasistas an que nomás bi yeran representaus os poderosos, -y prou que tampoco no imos a esfender l´autual parlamentarismo burgués- y una monarquia de basallos y esclabos per muito aragonesa que ísta siga, pero tot isto forma parti d´a istoria d´Aragón. D´un país que mientres 700 añadas estió independién y reconoixiu internazionalmén como tal y dende fa 300 ye gobernau per a oligarquía española que nos otorga un chiquet ran d´autogubierno en forma d´Estatuto d´Autonomia subordinau a la constituzión española y que toz os politicos de l´Alxafería en mayor u minor grau consideran como prou.

 

 

            Y tamién cal remerar toz istos feitos istoricos (aquí rezentaus de traza basica y resumida) perque son esconoxius ta gran parti d´o pueblo nuestro, son amagaus de forma cutiana per o rechimen constituzional borbonico y per os aragoneses asimilatos a él y son os alazez ta esfender a nuestra soberanía como nazión y o dreito de dezidir como queremos organizar-nos y bibir-ie.

 

 

            Amenistamos d´aprender d´a nuestra istoria, con as suyas luzes y güembras, y formar-nos policamén e ideolochica ta fer frén a la mentira española. No mos cuaca ista España ranzia, casposa y capitalista, queremos estar un pueblo libre y construyir con toz os demás pueblos, a ixena, un mundo chusto y dinno an que o capitalismo aiga pasau a os libros de istoria.

 

 

            300 años de semisión ye prou. Cal enantar enta l´autodeterminazión y a independenzia. Cal enantar enta o sozialismo.

 

XX Semana Cultural Madalena

http://madalena07.noblezabaturra.org/

El Matarranya a “A Enrestida”

Con enchaquia d’atras fitas ya ébanos charrau en iste mesmo blog sobre o bullir cultural y asoziatibo d’a Comarca d’o Matarranya. En muitas begadas o nuestro colectibo ya ha colaborau con chen d’astí, asoziazions y collas mosicals. Pero ista begada yeran ellos los que nos besitaban, en o nuestro zentro sozial, dentro d’as chornadas “Anti-Sgae” de Magofermín y tamién ta presentar-nos o nuebo CD “Sons del Matarranya”.  

Iste disco-replega ye trestallau en dos discos pretos, en que o primero ye adedicau a collas rock y o segundo a cantas más tranquiletas y mosica d’autor. Todas ellas en catalán y con collas d’Aragón.

Istos zaguers, os cantautors, serían os que ferían presenzía en un puesto como o nuestro zentro sozial, encara no parau ta grans conziertos mosicals. Antimás aprofeitemos a oportunidat de que belunos d’istos mosicos son bibindo en Zaragoza. “Duo Recapte” y “Temps al Temps” serían os encargaus de fer-nos una muestra d’o que podemos trobar en o segundo disco de “Sons del Matarranya”; y “Zarapolis” con a suya mosica d’autor y presentando unatro disco, ista begada en contra de “SGAE” en Rec’n Play.

D’una traza progresiba irían tañendo as suyas guitarras y bandurrias as tres collas. Primero o Dúo recapte, con bandurria y guitarra, mosicos prou experimentaus en a escritura en catalán d’Aragón. Belunos d’os asistens yeran relazionaus con a comarca y eban beniu de propio ta sentir a parla catalana en Zaragoza.

Zarapolis metería a nota de calidat mosical, ista begada en castellano, ta reibindicar a mosica libre y sin de tasas, una d’as suyas cantas amanixe en o disco “Rec’n Play” editau por Magofermín, La Karratxaka y una bentena de collas mosicals.

Ta remtar o dúo más choben “Temps al temps”, beniu dende a Franja, y cantando con muito sentimiento as cantas plenas de recosiros y referenzias a poetas d’a redolada. Prou que Desideri Lombarte sería uno d’os poetas más bersionaus.

A la fin una actibidat plena de significau, contribuyindo a enamplar o listau de conziertos y charradas que a lo largo d’un cabo semana plenan l’achenda alternatiba de Zaragoza; chen de toda mena se pasó o biernes 8 por A Enrestida y, a la fin, a chen d’Aragón que parla catalán beyen unatro puesto an que sentir-se refirmaus con a suya luenga y as suyas propuestas.

Conzierto cantautors Matarranya en ZSA A Enrestida. Biernes 8 Chunio

Fiesta cabo d'año A Enrestida

Atra traza de buena mosica combatiba con Pirat's Sound Sistema

Los que asistiemos o biernes 4 de Mayo ta l’Arrebato podiemos beyer o millor exemplo de como a mosica de luita s’esbiella y plega a limites d’una gran calidat. Os sonius electronicos de reggea, drum&bass, dance hall u hip hop se mezclón con as bozes en castellano, aragonés y catalán d’as bandas que pasón por l’eszenario de l’Arrebato. Debán d’a pancarta feita por o colectibo A Enrestida que deziba: Dos pobles la mateixa lluita / Dos pueblos a mesma luita, i actuón “Colectibo de Topos”, “Hardcólikos” y “Pirat’s Sound Sistema”. As dos primeras collas compartindo cantas, colaborazions y dj nos cantón sobre muitos d’os problemas que ellos beyen, dende a suya chobentut, a suya critica y o suyo lugar, Andorra (Teruel). En cheneral cantas de hip hop, con bella mezcla reggea y sonius electronicos.

A fuga d’o conzierto i plegaría cuan Pirat’s Sound Sistema puyón ta l’eszenario; un perfeuto soniu nabegau dende a mesa por un tecnico; o suyo dj: tot un “crack” espezialista en sonius de toda mena en una Sound System y os dos cantans con una perfecta puesta en eszena de mobimientos, chestos y cantas politicas. As letras charraban sobre a suya luenga, o catalán, y la traza con que puede estar emplegada una lengua minoritaria ta cualsiquier cosa que se proponga. A libertat d’os países chicoz y oprimius, a expeculazión en as gran ziudaz como Barzelona u Zaragoza, os tristes politicos, os fozins melitars... y asinas, asinas. A suya larga trayectoria en Correllenguas, fiestas por a “Independència” u as fiestas d’o bico de Gracia contrimostraban a suya experienzia en os eszenarios.

Dimpués de bella ora tocando, con un publico entregau beniu dende Zaragoza, Andorra, Franja, Balenzia u Catalunya;  sin aturar de bailar, cantar y chilar dión paso a una sesión de reggea y diferens mosicas menadas por o suyo Dj. As esichenzias d’os orarios por o bezindario fan que toz os conziertos rematen a las 11 con lo que os charrazos continón dica más tardi con os diferens componens d’as collas.

3 Mayo. NOS QUIEREN CHUZGAR A TOZ

4 Mayo.Pirat's Sound Sistema+ Hardcolikos + C. d Topos

Biernes, 4 de Mayo
20'00 oras
refirme 4€ (dentrada + mojito)
CSA Arrebato (C/Palafox s/n )

A Enrestida presenta...
Dos pueblos a mesma luita. Dos pobles la mateixa
lluita

PIRAT's SOUND SISTEMA

Dende o bico de Sants, fendo serbir o reggae/hiphop
como ferramienta de luita y compromís sozial, bienen
ta Zaragoza por primer begada a presentar-nos-ie o
suyo segundo disco: Vol.II
Os suyos direutos son una morfuga an que l'esprito
d'os sound system chamaicans fan un mezclallo con os
sonius d'os bicos de güe.
www.myspace.com/piratssoundsistema

HARDCOLIKOS
Choben encara que beterana colla de Rap-Hardcore que
plega dende l'Aragón xublidau.
Letras direutas y sin garra medrana. Sediles y
DjRuidos, Andorra la Jarkor.
http://www.myspace.com/sediles

COLECTIVO DE TOPOS
Biolins, samplers, flows, tabals... han quiesto
clamar-lo "reggae experimental" pero millor siente-los
tu mesmo y quita as tuyas propias conclusions, porque
bien se bale.
http://www.myspace.com/xinotopo

4 Mayo.Pirat's Sound Sistema+ Hardcolikos + C. d Topos

Pirat's Sound Sistema:
http://www.myspace.com/piratssoundsistema
Hardcolikos:
http://profile.myspace.com/index.cfm?fuseaction=user.viewprofile&friendID=113860151

VI Marcha contra la Macrocárcel de Zuera. Domingo 15 d'Abril.

Más info:

http://marchazuera.noblezabaturra.org/

Encara no ye tot perdiu (Franja Rock’07)

Cuan encara creyébanos que tot ye perdiu, que a chobentut aragonesa ye malmesa por a globalizazión, más que más en os lugars, an que encara ye más difízil fer bella cosa diferén a lo que te imposan,... pos astí nos trobamos con Pena-roja (o Matarranya) y o Franja Rock.

O 31 de Marzo se tornó a fer a ya setena edizión d’o Franja Rock, que antimás de contar con buenas collas de rock se mira cada añada de creyar a o suyo redol un ambién cultural, estiaño sería un zinefórum y a I Trobada de dolzainers de Pena-roja. En ista zaguera i partiziparían collas de lugars de toda la redolada, sabendo que ista comarca ye posada en un puesto estratechico amanau a lugars de Teruel, Tarragona y Castellón. Cada lugar portaría un cartel con o suyo nombre y, prou que sí, a colla de Pena-roja, do paix que os ninos aprenden antis a tocar a donzaina que a parlar a suya luenga materna, o catalán. Bels chobens animaban dende o microfono, a las diferens collas que las irían puntuando y a la chen, con bailes tipicos. Prou que o catalán no sería en garra momento a gran muga que belunos fan creyer, tanto con Tarragona y Castellón, como con Aragón.

A organizazión yera perfecta y un “catering” yera guisando tanimientres a gran zena ta todas as collas i combidadas, as tradizionals y as rockeras.

En o salón de fiestas d’o lugar prenzipión os coleutibos a parar as suyas distribuideras: chen benida dende Vilafranca del Penedés, Zaragoza, Alcañiz u a Codonyera. Toz ellos con muitas ganas de paroliar sobre as zagueras esperienzias, nuebos proyeutos, y a gran pregunta de cuasi toz os “Franja Rock” ¿Pero tos sentiz catalans u aragonesos?

Cuasi siempre con charradas en catalán u mesmo en Aragonés, pero con un sentimiento mutuo de chirmandat de fer-se respeutar a dezisión d’os lugars d’a Francha oriental d’Aragón, a tamás de pobres exzepzions.... y, prou que sí, sin consentir a imposizión cultural de l’Estau español.

A meya nuei prenzipiaría l’esperau conzierto rockero. En primeras con un biello conoxiu d’A Enrestida: Cesk Freixas con o suyo repertorio en solitario y agradexindo a toda la chen d’Aragón a suya rasmia. Dimpués i tañería a colla rock d’a redolada Baxo Aragonesa: Komando Ramone, con un rock clasico; ta continar con a banda catalana “Kamarada Kalasnikov” dende o Penedés que empliría de goi as orellas de toz os que nunca antis no l’ebanos sentiu. Colla “rockera” con apuntes “Oi” y una combinazión nobedosa con donzainas catalanas.

Cuan o conzierto remató as mesas d’os coleutibos, as collas mosicals, os asistens... y sobre tot os chobens d’o lugar de Pena-roja rematón con una buena sensazión. A sensazión d’as cosas bien feitas ta poder continar atra añada, a prosima añada será a güeitena. Animo y entadebán!!

A TORTURA N´O ESTAU ESPAÑOL

 O pasau 29 de marzo y dentro d´as autibidaz prebias a la VI Marcha contra la Macrogarchola de Zuera que se ferá o benién 15 d´abril, se fazió en a Facultat de Filosofía y Letras d´a Unibersidat de Zaragoza una charrada baixo lo titol de “Biolazions de Dreitos Umans en l´estau español”. Iste auto parau per a Iniziatiba Ziudadana contra las Garcholas que organiza toz os años a Marcha a Zuera contó con a presenzia como ponén de Jorge Del Cura, biello luitador per os dreitos d´as personas presas, miembro entre atras organizazións d´a Coordinadera ta la Prebenzión d´a Tortura (CPT) y ex-presidén de l´Asoziazión Contra la Tortura. Cal siñalar que a pachina web d´ista Asoziazión estió zensurada fa bels años per l´Achenzia de Protezión de Datos y les ne multó con 60 millons d´as biellas pezetas per fer publicos os informes añals de casos de torturas.

 

   De primeras se i fazió una esferenzia entre dos trazas de tortura, a inquisitiba, feita per as autoridaz u funzionarios publicos ta quitar bella informazión, per un regular en autuazións tocans a la clamada “luita antiterrorista”, y a punitiba, que tien per ocheto castigar a o deteniu.  Se cuentan asabelo de casos de tortura, nomás en as añadas 2000 a 2006 se´n rezentan más de 4000.

 

            Gosa tener-se l´ambista de que a tortura afeuta a bels seutors sozials concretos, como inmigrans, “separatistas vascos”, “drogadictos”… ye dezir, chen que se´n sale d´una suposada normalidat sozial y que tienen como chustificazión a mazada “bella cosa abrá feito”. En reyalidat no ye asinas, cualsiquier persona puede estar ocheto de tortura per parti d´os cuerpos represibos estatals. Son muitos os casos de chen que se podría calificar como “normal” d´alcuerdo con os canons imperans que en determinadas situazions (problemas de trafico, borinas con alto grau etilico, identificazions rutinarias, u mesmo ir t´a comisaria ta fer una denunzia per un atro tema… an que se produzen agresions y biolenzia per parti d´os funzionaris publicos, o caso d´a muerte d´un bezín de Roquetas per a guardia zebil que autualmén se ye chuzgando en ye buen exemplo. Mientres n´os casos de torturas a personas binculadas a mobimientos sozials u politicos bi ha respuesta popular y refirme publico, os  casos de chen anonima y no organizada gosan rematar amagaus, mesmo sin que a persona afeutada faiga la denunzia per miedo a represalias.

 

            Os territorios an que i amanixen mayor numero de denunzias son Euskal Herria, Madrid, Catalunya y Andalucía. Aragón se i troba en a metat entabaixo. En terminos porzentuals son os Mossos d´Esquadra o cuerpo polizial con más denuncias y en cuanto a numero reyal estaría a polizía local.         

A CPT refirma la creyazión d´un mecanismo instituzional que desembolique o Protocolo Facultatibo Contra la Tortura d´a ONU siñau per l´estau español. Parixe estar que ya se i ye trebaIlando, con a ideya de que iste nuebo organismo estatal faiga un analís de toz os casos, denunzie y meta midas ta prebar d´ebitar nuebas situazions. A posizión d´a CPT ye azeutar iste mecanismo, pero cosirando a suya autuazión ta que a la fin no remate en una traza de silenziar os casos. Per atro costau puestar que a regulazión d´iste mecanismo pertoque a l´Esfensor d´o Pueblo, Enrique Mújica, o que no ha feito guaire goyo a os coleutibos contra la tortura per a suya responsabilidat en midas como a dispersión de pres@s u a creyazión d´o rechimen FIES. 

  Con o silenzio y complizidat d´os meyos de comunicazión y as instituzions, en as comisarías y garcholas de l´estau español contina existindo a tortura, como en cualsiquier estau d´o planeta. A luita contra las biolazions d´os dreitos umans no ha d´aturar-se, y o 15 d´abril en Zuera ye una buena enchaquia ta amostrar ista reyalidat, solidarizar-nos con as personas presas y continar entadebán.

 

Festibal en contra d'a Mina de Borobia

Ante la nueva agresión contra el territorio que viene de la mano del intento -todavía- de instalar una mina de magnesitas en Borobia (Soria), que destruiría el medio ambiente y las posibilidades de futuro en las zonas afectadas por su impacto (riberas del Manubles y el Ribota en la Comunidad de Calatayud, valle del Aranda, etc.), l@s jovenes del  Manubles os invitamos a acudir al festival de resistencia contra la mina de Borobia 2007, que se celebrara en Villalengua y Torrijo de la Cañada el 6 y 7 de abril. Toda la información sobre actividades, charlas, conciertos,etc.

Zaragoza, Viernes 30 de marzo:
20:30 Proyección del DVD "Que No Minen Tu Tierra"
Y Después... fiesta
En el  ZSA A Enrestida (callizo San Cristobal, La Madalena,Zaragoza)

Villalengua: Viernes 6 de Abril:
18:00 Proyección del DVD "Que No Minen Tu Tierra"
y charla de la plataforma en defensa del agua y de la tierra.
En la Plaza Mayor.
19:30 Música y Malabares.Encuentro de malabaristas
En el campo de fútbol sala.
23:00 Concierto con Los Draps, Anarkosis, Matazía, Korrupzion36
En el Pabellón Municipal

Torrijo de la Cañada: Sábado 7 de Abril
Exposición permanente: "Fauna y Flora de la Comarca" a cargo de Ecologistas en Acción
18:00 Proyección del DVD "Que No Minen Tu Tierra"
charla de la plataforma en defensa del agua y de la tierra y Ecologistas en Acción sobre el pantano de Mularroya
En la Casa de Cultura
19:30 Pasacalles en la plaza Mayor
24:00 Concierto con Mallacán, Inerzia y Cabeza de Turko

Zonas de acampada
Todas las son actividades gratuitas
Mas info: [e-mail]

Manifiesto de resistenzia
Por a esfensa de l'augua y d'a tierra. No a la mina
de Borobia.

Güe nos toca tornar a debantar-nos debán d'una nueba
enrestida, agora ye Magnesitas y Dolomías S.L., una
interpresa naxida con l'unico proposito de foradar
os quinze kilometros de largaria d'a Sarra d'o Tablado,
en Borobia; d'estricallar o suyo paisache, de
rematar con a bechetazión y a fauna d'a redolada, d'ixucar os
suyos acuiferos y contaminar asinas o Manubles, o Ribota,
l'Aranda, etc., Una interpresa naxida ta foter un
truco de zinzel más en l'epitafio de l'esbenider d'os
nuestros lugars. A la fin, Magnesitas y Dolomías S.L
no ye que ixo, a ferramienta de belún a quí
esconoxemos, y cuyo unico enfuelgue ye enreziar as
suyas pochas a costa de tratar-nos, a nusatr@s y a o
territorio an que bibimos como ochetos, como
trastes molestos. Debán d'isto, a os abitadors
d'ista tierra no nos manca que plantar-nos, una begada más,
porque ellos y as suyas interpresas cambean de
nombres, pero nusatr@s somos siempre os mesmos.
 
Cosa ye estrania en ista situazión: fa más de
cuaranta añadas que o zentralismo dezidió que o
Manubles, Calatayut, o campo aragonés u o soriano,
no yeran que a reserba de man d'obra d'as
grans ziudaz industrials de l'Estau español.
S'empentó a disparixión d'a nuestro tarabidau produtibo
tradizional sin más opzión que a emigrazión. Dende allora nos somos tornaus, de
nuebas, en una d'as colonias
interiors d'o capital español: emigrans, una economía alezatada en
una agricultura de monocautibos, unos serbizios
gañosos y una industria inesistén. Y ta rematar,
somos @s que zeden obligaus a suya tierra a cambio
de micazas, y o suyo patrimonio natural ta
l'espulladura d'as suyas materias primas. A mina de Borobia ye a zaguer
armiella d'iste estrinque, an que mos aturamos y
dezimos prou.

Dende que se conoxió lo prochecto, os abitadors d'a
redolada emos prenzipiau una luita ta pribar a
establidura d'a mina en Borobia. Agora somos os
chobens os que prenemos a parola: somos l'esbenider
d'istas tierras y imos a aturar ista menaza; por os
que aquí ya discansan y por os que i naxerán, porque
aimamos a iste rio y a suya chen, por dinidat. O
prozeso ye larguizo pero ye menester remanir en a
mobilizazión, que s'estendille por todas as tierras
menazadas, que as nuestras reibindicazions
s'ascuiten
en Calatayut, Zaragoza, Soria, Balladolit.
Somos responsables d'o patrimonio natural y cultural
que os nuestr@s lol@s nos dixón, por tot isto:
- Reclamamos, que se rispete o meyo natural con
declarazions de impacto ambiental reyals, al igual
que se beile por la superbibenzia d’os nuestros
lugars
con una declarazión de impacto sozial.
- Desichimos, cambios de raso en o tocante a
guaranziar o nuestro dreito a dezidir, porque no ye
de chustizia que se innore o referendo que fazió lo
lugar de Borobia y que resultó con un rotundo 80%
contrario a la mina.
- Albertimos, que a luita continará dica que
disaparixcan as menazas sobre os ríos, a suya chen
y as suyas tierras.

No a la mina de Borobia.
Manubles no rebla.