L’aragonés se fa sentir en o ”Oinez’07”de Viana

Yera a primer begada que una colla aragonesa tañeba en iste festibal por l’euskera y de seguras que a mayor parti d’a chen que i yera no’n sabeba guaire de l’aragonés, y ixo que somos países bezins. Pero a maquinaria de l’Estau ye mui fuerte y o desconoximiento ye a suya ferramienta.

Pero estoi que a partir d’o domingo a cosa cambiará; en o cartel d’o “Nafarroa Oinez’07” de Viana se podeba beyer que tocaban a zaguera ora y en l’eszenario 1 d’o lugar (clamau “Erentzun”) una colla d’Aragón, o nombre “Prau”.

Encara que a plaza no yera plena a rebutir tampoco no podemos dizir que toda la chen que i yera, yera d’Aragón porque a berdat ye que tampoco no bi’n eba guaires. Pero en bels momentos se i creyó un buen ambién.

Malas que ba comenzar os comentarios entre canta y canta surtiban d’as bozes de Prau: explicando a reyalidat trilingüe d’Aragón, refirmando l’euskara en Nabarra, amostrando os instrumentos tradizionals aragoneses…a chen encara le truca o ficazio beyer una gaita de boto tocada por aragoneses.

As cantas iban una zaga d’atra y ya a la fin puyarían dos compañers d’a colla a fer una chiqueta colaborazión con as donzainas d’o país… A chen bailaba encara que no se sabese as cantas y a fuga plegaría cuan bels compañers aragoneses puyarían ta l’eszenario con un pancarta feita de propio: “L’aragonés ofizial” “Euskara ofíziala” con o lema d’o festibal d’estiaño “Giltza daukagu”(Tenemos a clau).

A chen s’amanaba a felizitiar a la cantante de Prau, s’enfuelgaban de sentir que bi eba chen difuera d’Euskal Herria y en Aragón que refirma-se a suya luita. Asperemos que a colaborazión entre os dos pueda continar d’aquí entadebán a tamás de que bels meyos de comunicazión siempre se mirén de enfrontinar-nos.