Mosica y Cultura en os Pilars de A Enrestida

Atra añada más, y ya en son cuatro, A Enrestida se tornó en punto de referenzia a lo largo de toda las semana d’os Pilars en Zaragoza. Y ya no somos sólo que charrando de borina y enfuelgue, sino de cultura y exaltazión mosical. Un punto de trobada an que charrar con a chen u compartir experienzias, y talmén o prenzipio de bel nuebo prochecto.

Y asinas o primer diya de fiestas podiemos beber-ie y sentir a os representans de dos fiestas, prou beteranas, en a rebindicazión de dos luengas minorizadas bezinas: “Nafarroa Oinez” con euskara y “L’aragonés en a carrera” con l’aragonés. Peio y Chan, respectibamén, nos contón as dificultaz y as alegrías de más de 25 añadas rebindicando istas luengas, fendo-lo d’una traza festiba y de bez podendo finanziar a suya amostranza en cambras de tot lo territorio.

A borina bi continaría ixe mesmo diya y a lo largo de toz os Pilars, de bez que se colaboraba en a nueba plataforma “B.I.C.” con barras en a Plaza Asso. Toda la informazión sobre iste “Bloque” ya ha plegau enta o puyal de chen que se i amanó y, por lo que emos puesto beyer en papers como l’ABC, tamién ta os que no se i amanón.

Ta rematar, o sabado 13, cuan zentenars de aburrius martirs partizipaban en l’entierro d’as carreras d’o zentro de Zaragoza, nusatros contemos con l’alegría y calidat d’una colla como “Boira Preta”. Cantas tradizionals, reinbentadas y mesmo nuebas creyazions; gaitas, dulzainas, curdión,… y una buena boz, nos trayón ta un Z.S.A. A Enrestida pleno acaramuello a buena mosica aragonesa acompañada de bailes y animazión.

Asperemos que a buena asistenzia de chen en istas fiestas no siga una casualidad, y t’o buen zarpau d’actibidaz que i femos tot l’año i acuda toda ixa chen que se pasó por os Pilars. Borina sí, Luita tamién!!