VII Chornadas de Unibersidá. Procheczión: Aragón. 25 años después.

O chuebes yera un diya espezial, antiparti de que en Zaragoza plebeba (cosa cada begada más rariza), se feba a primera procheczión d’un nuebo documental sobre Aragón. As VII chornadas que o colectibo “Unibersidá” organiza sobre os dreitos y libertaz d’Aragón feban a presentazión d’o documental “Aragón. 25 años después” feito por Miguel Montañés y Isabel Soria, y con a colaboración de Francho Dieste . Yera a suya primera procheczión y por o trailer que ébanos puesto beyer teneba buena pinta: un documental charrando sobre o progreso u retraso d’Aragón en istas 25 añadas de democrazia. Un documental de bella oreta grabau con prou buena calidat en bel lugar d’a comarca d’os Monegros, os mesmos paisaches que probablemén en unas añadas beigamos cambiaus de tot por o macroprochecto “Gran Scala” (anque os protagonistas se afanón en aclarar que por lo que diziban no sería en ixos mesmos puestos).

As tendenzias y a influyenzia no s’eslampa, y cuan fazión referenzia a que a ideya eba surtiu fa 3 años a dengún no se l’escapa que por ixas calentadas a soziedat encara yera sorprendida por una mena documental antis no bisto y que trataba temas de politica identitaria dende toz os costaus “La pelota vasca”.

“Aragón. 25 años después” se mira d’estar, d’una traza orichinal, una ambista sobre a opinión cheneral que se puede trobar en un lugar cualsiquiera d’a deprimida y socarrada comarca de Monegros. Ta ixo se preba de que bi aiga chen de todas as sensibilidaz. Como os suyos autors nos dizión o chuebes, bi ha chen d’o PP, PSOE, PAR, IU, CHA,… y chen independién no influyenziada por garra partiu. A diferenzia d’o documental de Julio Médem no se beyerán os nombres d’as personas dica la fin y en garra momento se dizen a que partiu son adscritos, … anque te puedes fer una ideya.

O documental ye trestallau en temas u reflexions que han estau importans ta Aragón en istas 25 añadas: chen, augua, modelo d’Estau, infraestucturas, esbenidero, problema…. y cadagún ba dando a suya opinión posau en una silla. Como tos he dito bi ha de tot.

A nota musical la mete una banda mitica aragonesa, Skabeche Riber Band con a canta “25 años después” como banda sonora.

Ta rematar y como critica (no tot puede estar bueno), atamás de dar a sensazión d’un documental de calidat (se ba a prebar d’estar emitiu por Aragón Telebisión) o soniu se fa de difízil entender a begadas: talmén por a poca bocabulizazión de bel combidau, talmén por l’aire que bufa en a estepa monegrina,…; y dende un colectibo como A Enrestida no podemos dixar sin pasar a manca de presenzia d’una corrién como a nuestra, con ya cuasi 5 añadas d’existenzia y que ta muita chen contina estando ignorada ta pende que cosas.

Cómo reflexión final asperar que iniziatibas d’ista mena continen. Ideyas en i hai ambute pero, tal y como se comentó en a posterior rufierta, nos mancan meyos de calidat ta fer ascuitar corriens diferens a las imposadas dende os meyos controlaus y imposaus.