L’academia de l’aragonés en as chornadas de “Unibersidá”

Dentro d’as “VI Chornadas por os dreitos y libertaz d’Aragón” o coleutibo unibersitario “Unibersidá” eba combidau o chuebes 21 d’Abiento a bels academicos d’a rezién creyada Academia de l’Aragonés. Ellos nos esplicarían como iba caminando l’academia, o por qué d’a suya esistenzia y cuals yeran os preyeutos esbeniders.

A la fin podiemos beyer a tres d’os académicos más autibos de l’academia y reperesentans d’as bariedaz más representatibas de l’aragonés. Prenzipió a charrada o secretario Fernando Sánchez, seguiu d’o suyo presidén Manuel Castán y o grueso d’a charrada sería esplicaniada por o suyo tresorero Juanjo Lagraba.

A poca chen que astí yéranos ya sabébanos d’o trascurso de “Chuntos por l’aragonés” y d’o “II Congreso” dica plegar en l’academia, con lo que a charrada se tornó en una rufierta ubierta an que publico y ponens se preguntaban o por qué de l’academia y d’o suyo funzionamiento. Fernando Sánchez esplicó cómo iba a estar trestallada l’academia y cómo os académicos ya s’eban asiganau bellas comisions pendendo d’os suyos intreses y conoximientos. Pero cómo siempre a clau sería en os fablans patrimonials, comisións como a de soziabilizazión eban d’estar alzadas ta la chen en contauto con os fabladors patrimonials, y muestra d’isto yeran os dos ponens d’ista charrada. Manuel Castán y Juanjo Lagraba yeran os representans de dos d’os dialeutos más esferens de l’aragonés, o benasqués y o cheso respeutibamén, pero tamién os que con más bitalidat se conserban. A la fin una charrada que contó con dos ponens de luxo y un secretario con cada begada más influyenzias “campesas” dimpués d’os suyo treballo de replega en o lugar ribagorzano. Puestar que belunos creigan que l’aragonés s’esboldregue en bel tiempo, pero con l’aduya de chen que como ista, y talmén una miaja de refirme d’o Gubierno será mui difízil. Como Fernando nos esplicó ya se son prenzipiando nuebos treballos de replega de léxico, estudio de morfosintaxis y mesmo bel apartau que se ha xublidau y ye a punto de perder-se, como a entonazión. Todas ixas nuebas las podremos ir beyendo a suya nueba pachina web: www.academiadelaragones.org