A Sacralizazión d'as Fiestas

Ya somos en o berano, y como todas as añadas ye la puenda an que más fiestas y zelebrazions se i chuntan. Más que más en os países mediterranios y con un orache que faiga onra ta l’acullida de chen en as carreras. Muitos dizen qu’ixo nomás pasa en l’Estau español, que ye uno d’os rasgos d’una cultura unica "typical spanish"; pero de seguras que qui dizen ixo no s’abran paseyau por as fiestas d’a Toscana italiana, Sardinia, Grezia u Croazia. Y cuan nusatros somos en a puenda ibernal a chen d’os países de l’emisferio Sur como Brasil, Uruguay u Archentina tamién se encargan de contrimostrar-lo.

A custión ye que malas que plega a Primabera, y más que más o berano, os nuestros lugars y ziudaz se plenan de fiestas y zelebrazions. Encara que ta una mayoría de chen laica istas fiestas ya no representan garra adorazión u benerazión a garra santo u birchén, a reyalidat ye que todas istas portan un nombre que fa referenzia a la bida relichiosa. Fa bellas semanas beyemos como en o internazional pregón d’os "San Fermins" Xabier Eskubik conzellal d’Aralar en Iruña gosaba eslampar un ¡Biba as fiestas de San Fermín! y no pas o serbil chilo de "Biba San Fermín", un ombre que dengún d’os astí presens nunca no eban conoxiu y mesmo se desconoxe d’a suya esistenzia beridica.

Exemplos en tenemos ambute en tot Aragón, y cuan plega o mes d’Agosto toz os nuestros lugars tienen bel Santo t’adorar plegando a la fuga d’o 15 d’Agosto cuan amanixen as birchens por toz os costaus.

Eszepzions bi’n ha dentro d’Aragón, podendo-se prener como exemplo ta la conmemorazión de futuras fiestas. Ferias y fiestas que remeran cuan antismás se chuntaban en a benda de ganau u mastos, lugars como Biescas, Boltaña u Borja remeran ixas ferias que a la fin s’han tornau en as fiestas grans d’o lugar..

Prou que istas fiestas no son fixadas en calendatas aleatorias, a Ilesia cuan prenzipió a cristianizar Europa en os tiempos d’os romans se encargaría de fixar as calendatas d’adorazión cuan más y millor acullida tenesen entre a poblazión. De toz ye sabiu que o Nadal no prenzipió a zelebrar-se con a cristianizazión y dinantes a chen de toda la Tierra ya zelebraba o solstizio d’Ibierno, asinas como o solstizio de Berano que a Ilesia s’encargaría de trasformar en o diya de "San Chuan". No solo que ixo, sino que a sacralizazión de ritos como palotiaus i ha estau perén, por no charrar d’a "españolizazión" de ritos relichiosos en romerías y prozesions, imno d’España incluyiu. Exemplos en i hai ambute y muitos d’os lugars d’Aragón que han bisto como baxaba o suyo zenso d’abitadors han cambeau as calendatas d’as suyas fiestas enta o berano. Por lo tanto a fin d’a fiesta ya no abría d’estar relichiosa sino ludica y soziabilizadera. Y todas as autibidaz que se i fesen abrían d’estar culturals.

Cuan ya fa más de diez añadas as asoziazions culturals y coleutibos d’o bico d’a Madalena se planteyón organizar as fiestas d’o suyo bico toz coinzidiban en que no eban d’estar con una fin relichiosa, y encara que o nombre d’o bico en ye, remataría clamando-se como güe la conoxemos "Semana Cultural d’a Madalena".