Os Chuizios que amagan os meyos

Cuan astí por o 21 de Nobiembre d’a zaguera añada prenzipió a bista oral d’o macrosumario 18/98+, a “causa cheneral” contra a cucha abertzale rezibió en primeras un gran empente mediatico, con prous notizias que se miraban de confirmar as tesis d’o chuez Baltasar Garzón, a Fiscalía y os abogaus de l’acusazión particular. Pero estió prou unas pocas sesions ta que quedase en ebidenzia, no nomás o sinsentiu d’o sumario, sino tamién as graus chapuzas y despropositos que s’eban acumulau en a fase d’istruzión. Por atro costau, a imachen d’os más de zincuenta encausus yera mui luen d’a que se puede bender como a de “peligrosos terroristas”, y a suya determinazión politica y a consistenzia churidica d’os suyos abogaus meteba en más d’un apuro a o tribunal.
Asinas que, a o poco de prenzipiar, o chuizio d’o 18/98, l’alfaya d’a baralla chudizial de l’Estau contra o independentismo basco, desaparixió d’a mayoría d’os meyos.
Pero en istos güeito meses han pasau muitas cosas y iste chuizio se ha tornau, en buena mida, en un espiello de lo que ye a luita contra a cucha aberzale. En istos intes en os que o Gubierno español y o PP- y os suyos altabozes meyaticos- fan tantas menzions a la bichenzia y supremazía de l’estau de dreito, lo que se ha bisto ha estau un tribunal que se saltaba os alazez d’o Dreito, as leis y mesmo a dotrina de cortes internazionals; un sumario foradau por a desaparizión de documentazión; un firme desconoximiento d’a reyalidat d’Euskal Herria, plegando a produzir-se intes caricaricaturescos; y s’ha bisto tamién o disprezio d’a presidenta por os acusaus. Istos, por a suya parti, leban güeito meses condenaus a continos biaches ta Madrit ta pasar oras muertas posaus en un banquillo, con o desgaste fisico y o coste economico que ello suposa. Belunos han sufriu azidens, atros graus enfermedaz. Jokin Gorostidi murió poquet antis de tener que ir-ie a declarar. Con tot y con ixo, a suya determinazión contina firme y por un regular ideyan nuebas formulas ta denunziar ista situazión.
Pero una gran parti d’a opinión publica no se’n ha enterau de mica d’isto, porque ista causa ye impresentable mesmo ta qui aplaudión o suyo prenzipio. S’entibocón qui dizen que iste ye un chuizio d’o pasau. Debese estar-lo pero no’n ye. Ye un chuizio d’iste presén que no encaxa con o que debese estar un tiempo d’asperanza, pero que l’Estau s’enzerrina en mantener autibau ta emplegar-lo como una ferramienta más de desgaste y menaza.
O mesmo caso l’emos puesto beyer en un chuizio en Aragón, porque aquí tamién en tenemos, por a demanda de condena ta os tres ex-altos cargos d’o Menisterio de Meyo Ambién a os que imputaban bellas presuntas corruptelas en a tramitazión d’o proyeuto de recreximiento de l’entibo de Yesa dende o conzello d’Artieda.
A mayoría d’a chen de a piet no ese puesto prexinar que se yera fendo en Madrit un chuizio de tan alta grandaria y importanzia ta l’esbenidero d’a nueba cultura de l’augua en Aragón. Dende que prenzipió o chuizio tasamén se podión leyer bels comunicaus que l’asoziazión Río Aragón y o conzello d’Artieda feban y que plegaban con cuentagotas a los meyos. Bi eba un ambién de medrana en os meyos anti-meyoambién y pro-caziquils que no gosaban nian tartir por lo que podese pasar, y ye que yeran tan esclateras bellas pruebas y as razons por as que se inculpaban que se podeba beyeba un final feliz entre a boira d’auguas que rodian a istos lugars.
Pero a la fin l’aparato chudizial y mediatico de l’Estau ha feito de nuebas beyer as suyas garras. Malas que se conoxió a notizia d’o desestimamiento d’a demanda y a perda d’o chuizio por parti d’os bezins d’Artieda, toz os meyos pretón a eslampar portadas y ringleras de satisfazión; partius politicos y asoziazions de reganos clamando por un luego rematar d’as obras de toz os entibos d’Aragón.
Tanimientres asperaremos que istos meyos no tornen a autuar, será o siñal de que a nuestra bitoria i abrá plegau.