Cabo d'año d'as zagueras echecuzions de Franco.
Mañana cuando yo muera
No me vengáis a llorar.
Nunca estaré bajo tierra
Soy viento de libertad.
José Paredes Manot "Txiki".
Revolucionario vasco
27 de Setiembre de 1975. 5 melitans reboluzionarios son asesinaus en cumplimiento d´as sentenzias de pena de muerte a las que estioron condenaus en o que sinnificón os zaguers intes d´a dictadura de Franco. Ángel Otaegi y Juan Paredes Manot "Txiki", 2 chobens autibistas d´a organizazión basca ETA y Xosé Humberto Baena Alonso, José Luis Sanchez Bravo y Ramón García Sanz, combatiens d´o FRAP, morión sin que o gubierno d´o faxismo español ascuitase a clamor popular dentro y difuera de l´estau contra las execuzions. Toda una impresionán mobilizazión popular a ran mundial no estió prou y a bestia morió matando en un nuebo chesto de crueldat, uno más dimpués de cuasi 40 añadas de terror.
En istas calendatas, cuan son cumplíus ya 31 años d´as muertes, encara remane en l´alcordanza de muita chen,más que más en o País Basco, l´exemplo de luita d´istos 5 mesaches, que como muitos atros antis, dixon a suya bida per esfender a libertat y a chustizia sozial y per estar consecuens con ixa esfensa. Cada 27 de setiembre en muitas ziudaz y lugars de toda Euskal Herria contina omenacheando-se a fegura de toz os luitadors cayíus d´ayere y güe n´o que se clama o “Gudari Eguna”.
Pero antimás de remerar istos asesinatos estatals, cal parar cuenta en quí estioron os culpables. Un dictador decrepito que teneba arredol una ripa de matarifes como él, que continoron medrando dimpués d´a suya muerte con a instaurazión d´a “democrazia” borbonica, belún mesmo como presidén d´un país situau en o nor-ueste d´a peninsula(¿!), una clase empresarial y finanziera que refirmó a dictadura como meyo ta enamplar o suyo esquimen y un partíu politico eredero direuto d´o pensamiento españolista más ranzio y de ultra dreita que encara no ha demandau sincusas per o suyo pasau pero tien a barra de exichir condenas u silenzios.
Y cal alcordar-se-ne ta que o sistema no s´apropie d´a suya memoria y la transforme en un producto de consumo como ha prebau de fer con a memoria y a luita d´o melitán autonomo Salvador Puig Antich, asesinau tamién per o faxismo una añada antis. A rasmia de toz els ye parti d´a rasmia d´o pueblo cuan prene conzienzia d´a suya situazión y luita per liberar-se-ne. En Euskal Herria, en Aragón, en tot l´estau español y en cualsiquier parti d´o mundo a luita per a liberazión d´os pueblos y per o sozialismo contina entadebán.
Ta informar-se-ne más en o rete:
http://www.nodo50.org/27septiembre/
Bideo-omenache:
0 comentarios