Fa una añada que se fazió a zaguera manifestazión antitaurina en Zaragoza, en as zagueras fiestas d’o Pilar. Cuasi una añada dimpués d’una fita istorica, a mayor manifestazión antitaurina y animalista que nunca no s’eba feito en Aragón. Una añada d’aquella tardi en a que cuasi mil garganchons estió una ta dizir NO a o negozio taurino y PROU a aquels que les fa goyo o sufrimiento d’os animals. Estió, sin garra duda, tot un esito de partizipazión y d’organizazión que emos superau estiaño.
Pero en ista zaguera añada han pasau muitas cosas, cuasi todas positibas ta o mobimiento antitaurino. Por exemplo, en Cataluña, ya son más de 30 os monezipios que se han declarau antitaurinos y amans d’os animals. Tamién en Cataluña, o sentimiento antitaurino ha plegau enta o Parlamento, y se i ha tratau a posibilidat de biedar por Lei as corridas de toros, encara que o tramite s’ha aturau por as elezions antizipadas en ixa comunidat. Si no estase por iste "cambio de gubierno", de seguras que por istas engüeltas seríanos charrando d’atra comunidat autonoma en a que as corridas de toros serían biedadas, superando ixa imachen biella de l’Estau español gozando d’a muerte d’un poliu animal.
Difuera de Cataluña, o mobimiento anitaurino tamién ha contrimostrau que ye más bibo que nunca. Antimás d’a manifestazión de Zaragoza de l’añada pasada, muitas atras ziudaz s’han animau a manifestar-se en contra d’a tortura taurina: Madrit, Barzelona, San Sebastián, Bilbao, Obieu, Cádiz, Castellón y atras muitas ziudaz han chilau NO a o maltrato a os animals en trazas d’espeutaclo tradizional. Antimás, istas manifestazions son cada begada más numerosas, contrimostrando que, contra o publico taurino, cada begada somos más os que refusamos cualsiquier mena de tortura a os animals en nombre d’a cultura, d’os diners u d’a tradizión.
Y estiaño ha estau tamién l’añada d’as combocatorias masibas en contra d’atrás autibidaz taurinas diferens a las corridas de toros. Asinas l’Enzierre Umano de Pamplona, organizau por PETA en colaborazión con atras muitas asoziazions en os Sanfermins, como a manifestazión en contra d’o "Toro de la Vega" en Tordesillas, combocada por o PACMA en o mes de Setiembre, han meso firmes esitos d’asistenzia y d’organizazión. Más de dos mil presonas en a primera fita, y más de zincozientas en o segundo, en o que cal chugar-se o fesico ta contrimostrar o nuestro refuse a la tortura, suposan un gran logro ta todas as asoziazions y particulars que emos partizipau en istas aizions a ran estatal. Logro que antimás, ha teniu un importán eco en os meyos de comunicazión, no siempre guaire afins a os nuestros ochetibos y rebindicazions.
Como contrapartida emos de denunziar publicamén a las entidaz que estiaño empentan as corridas en Zaragoza y que son Heraldo de Aragón, Cajalón, Conzello de Cuarte, y Vino de Borja. O nuestro refuse y boicot a toz ellos.
Cada begada somos más. Iste ha estau l’añada d’a mobilizazión cheneral en toda la peninsula. Ye o resultau de muitas añadas de conzienziazión ziudadana que agora prenzipia a dar os suyos fruitos. Y isto no ha feito que prenzipiar, como a bola de nieu que roda sin aturar-se fendo-se cada begada más gran dica que l’esclate a o mundo taurino y a os politicos que la sochetan.
As nuestras armas son a razón y o catén. Y imos a continar como a chisla d’augua que caye una zaga d’atra en a piedra dica que la forada. No tenemos diners ta as nuestras campañas, ni controlamos mica meyo de comunicazión de masas, ni tenemos representazions parlamentarias, pero ni ixo, ni cosa ba a fer que iste mobimiento contine crexendo.
Taurinos y politicos, ¡paraz cuenta!, l’añada benién, en seremos muitos más.
- - - - - - - - - - - - - - - -
Ta rematar, agradexer a las entidaz que han colaborau u s’han chuntau ta la manifestazión:
A Enrestida
Amnistía Animal
Asociación de Vecinos La Madalena
C.G.T.
Chobenalla Aragonesista
Colla Antitaurina Oszense
Ecologistas en Acción
Gentes de apoyo a la liberación animal
Juventudes Comunistas de Aragón
Rebel
Sociedad Aragonesa de Protección a los Animales y Plantas
Unibersida-UCA
Y muitas personas a ran indibidual.
Grazias a toz por a buestra asistenzia y remerar que siempre bi abrá una manifestazión o primer domingo de fiestas.
Yes combiau/ada a partizipar en o pasabillas de carnabal baxo o lema: "Por un Fin del Mundo Ecológicamente Sostenible". 
