Blogia
A Enrestida, diya par d'atro

O Golpismo de l’Echerzito español.

O Golpismo de l’Echerzito español.

Exemplos como o Cheneral Mena ixemenan tot un echerzito español que de golpes en ha ambute. Iste mesmo afirma en o suyo zaguer libro que zinco d’os 13 chenerals de l’Echerzito secundaban a suya propuesta d’interbenzión melitar contra l’Estatut de Catalunya.

Ista notizia sirbe ta contrimostrar as opinions que dizen que l’Echerzito ye útil y se ha a menister ya que “sirbe ta esfender-nos a toz/todas en caso d’imbasión”. Os que bibimos en l’Estau español sabemos de l’exerzito español, y sabemos que en as zaguers 250 añadas ha estau más una menaza y una maldizión que una esfensa; golpes d’estau continos, dictaduras, mesmo una guerra zebil nos ha costau que nos “esfiendan” istos salbadors. En ixas epocas, y tamién en ista, antimás d’estar una menaza contina a la libertat, a democrazia, y os dreitos d’os ziudadans de l’estau español, tamién ha estau un echerzito en primeras colonialista, y dimpués imbasor de países pobres, a mayor gloria d’os intreses economicos d’as grans interpresas. Ta qui dizen que tot ixo ya pasó, y que iste Echertizo no tiene mica que bier consigomesmo pero de fa decadas, sirban datos como o que nos proporziona o cheneral Mena.

En a nuestra opinión l’unico acto combinzén y razional que les queda a os melitars españols ye o de desmantelar ista institución peligrosa y pudorosa. Como diz a frase “A unica maniobra melitar onrosa ye a retirada”.

Y ye que o cheneral Mena proponió en una reunión con chenerals que o Rei frenase l’Estatut, seguntes parolas suyas “Plegau o caso, abrá d’estar ista mesma istituzión (a corona), refirmada por as Fuerzas Armadas, a que salbaguarde a unidat d’España si os politicos la meten en peligro y a Chustizia no bi interbiene”. A frase, golpista de tot, estió pronunziada debán d’o Consello Superior de l’Echerzito y la rebela o propio melitar, retirau a la fuerza, en o suyo zaguer libro “Militares. Los límites del silencio” presentau o 20 de Febrero en Madrit. Lo que nos alticama ye que Mena continó estando chefe d’a Fuerza Terrestre, con 30.000 melitars baxo o suyo mando, dica cuasi tres meses dimpués. Ixa begada, en a pascua melitar, Bono ordenó a suya destituzión y pase forzoso enta la reserba dimpués d’amagar con a interbenzión d’as Fuerzas Armadas si l’Estatut se blincaba a Costituzión. Cuan ya eba esclatau l’escandalo rezibió clamadas de nueu d’os 12 teniens chenerals y d’ellos “uno se’n ufrió a secundar a suya actitut y atros cuatro s’amostrón d’alcuerdo con lo que eba dito”.
Tamién a primers de Febrero o comandante melitar d’A Coruña y Lugó, Lorenzo Fernández, estió engarcholau por un informe sobre a memoria istorica. O coronel ha estau apartau d’o suyo destino y s’enfrontina a un expedién que puede estar “Grau” u “mui Grau”. As fuens consultadas dizen que se ha alpartau a iste cheneral ta acallar as bozes de l’Echerzito,  contrarias a ista lei. Iste cheneral ya estió arrestau por ordenar una carga contra una manifestazión autorizada contra l’ingreso d’España en a OTAN en 1981. Fernández Navarro estió acusau d’encabezar, pistola en man y bestiu de paisano, a carga en a que se i prenió a siete personas.
Ta contrimostrar a funzión de l'echerzito en iste zaguer sieglo, leigan-se iste listau de golpes d'Estau que se puede beyer en a Wikipedia:
http://es.wikipedia.org/wiki/Autogolpe

 

0 comentarios