Blogia
A Enrestida, diya par d'atro

¿QUE YERA O M.I.L.?

¿QUE YERA O M.I.L.?

A polemica surtida en os zaguers meses en bels meyos alternatibos a radiz de l´enguero d´a zinta Salvador ha retornau a la autualidat o nombre d´o suyo protagonista, Salvador Puig Antich y d´a organizazión n´a que melitaba, o Movimiento Ibérico de Liberación. As creticas, probeniens d´antigos melitans d´o MIL y de personas que bibión os feitos i rezentaus fan referenzia a que a zinta (ya disponible en emule) pasa por denzima de muitos aspeutos politicos alazetals en a istoria de Puig Antich y o MIL, presentando a ista organizazión como una simpla colla antifranquista, sin parar cuenta en que yera muito más que no ixo. O MIL no luitaba unicamén contra la dictadura, sino que más que más lo feba contra o capitalismo, representau per l´estau faxista español.

Os orichens d´o MIL se troban en un seutor de Comisions Obreras que bi eba en Barzelona a la fin d´os 60´s clamau "Plataformas de CCOO". Ista corrién esfendeba o carauter independién, auto-organizatibo y de base d´as primeras CCOO (que funzionaban como consellos obreros creyaus debán de bel conflito ta fer-le respuesta) antis de que cayesen en mans d´o PCE y as transforma-se en o suyo sendicato, burocratizau y poquet a poquet más colaborazionista con o capital. Miembros d´istas Plataformas exiliaus en Tolousse contautoron con chobens anarquistas en ista ziudat oczitana y dezidioron de pasar a l´aizión.

Contra o que se gosa dezir per os meyos ofizials, no yera una colla que se podese calificar como anarquista, de feito consideraban superada en a prautica la dibisión entre marxistas y anarquistas. Os suyos alazez ideolochicos probeniban d´un marxismo cretico amanau a os comunistas consellistas olandeses u alemans d´os años 20-30 y a os situazionistas en os 60, esfendendo lo que se conoix como autonomía obrera.

Se definiban como comunistas, pero contrarios a las posizions elitistas y banguardistas d´as collas alazetadas en o leninismo y en as suyas corriens (maoísmo, trotskismo, stalinismo…autuando como una colla de refirme a las luitas d´os treballadors y no pas una banguardia u partiu que pretende enfilar a la clase obrera dica o paradiso sozialista. A emanzipazión d´os treballadors eba d´estar faina d´os mesmos treballadors.

L´aizión politica d´o MIL se endrezaba enta dos sentíus: l´achitazión armada con os Grupos Autónomos de Combate (MIL-GAC) y a espardidura de textos anticapitalistas per meyo d´a "Biblioteca Sozialista"

Entendeban l´achitazión armada en oposizión a la luita armada que prauticaban as organizazions reboluzionarias clasicas. L´achitazión armada s´encuadraba dintro d´a luita de clases, pero prebando d´ebitar a "profesionalizazión" y a mistificazión d´ixa luita. Con ella se obteneba esquimen, (prenzipalmén con a expropiazión de bancos) ta autofinanziar-se y finanziar os comités de baga y os obrers represaliaus y tamién se feba beyer a os treballadors que ye posible auto-organizar-se y responder a la biolenzia de l´estau y d´o capital, fendo-les retacular. Se pretendeba radicalizar as mobilizazions obreras y fomentar a creyazión de nuebos núcleos d´achitazión reboluzionaria en atros puestos, dica la insurrezión popular cheneralizada.

Con parti d´os diners que quitaban d´as expropiazions feban a publicazión de textos y fuellas d´a Biblioteca Sozialista en a suya editorial "Ediciones Mayo del 37" que espardiban entre os treballadors, publicando-ie a biellos autors marxistas no guaire conoxius y creticos con as posizions dominans en a cucha: Anton Pannekoek, Herman Gorter, ex-trotskistas como Ante Ciliga, anarquistas como Camilo Berneri u textos d´a Internazional Situazionista, asinas como los suyos propios textos de carauter autonomo. También feban una rebista a la que clamoron con zierta sorna CIA (Conspiración Internacional Anarquista).

………………………………………………………….

2ª Parti

O MIL tenió contautos puntuals politicos u lochisticos con atras organizazions armadas como ETA u OLLA (independentistas catalans de tendenzia antiautoritaria eszindius d´o PSAN, Partit Socialista d´Alliberament Nacional dels Països Catalans).

OLLA, sieglas d´Organització de la Lluita Armada, yera un nombre meso per a polizía a ista colla ta identificar-la de bella traza, pues en primeras autuaban sin nombre. Se fazió un poder, más que más per parti d´a clamada OLLA, ta chunificar-sen con o MIL, pero no estió posible, a pesar de l´afinidat politica en muitos puntos que i existiba, ya que o MIL no yera independentista.

Dimpués d´un prozeso de reflexión interna debiu a bellas contradizions y tensions entre os suyos miembros, dezidión de autodisolber-sen n´o berano de 1973 con l´ideya de separar os suyos dos proyeutos d´aizión politica (l´achitazión armada y a edizión de literatura politica), ta poder funzionar millor. Pero pocas semanas dimpués d´ixa disoluzión a represión polizial s´abatió sobre els, indo-ne muitos a la garchola e impedindo-les continar con a nueba estratechia dezidida.

Salvador Puig Antich estió feriu y deteniu en setiembre de 1973 dimpués d´un tiroteo n´o que i morió un polizía. Condenau a muerte, estió asesinau legalmén a garrote bil chunto a un preso sozial en marzo de 1974. Ista muerte transformó una chicota colla reboluzionaria como lo MIL, que nomás yera conoxida en o Principat, en unas sieglas que forman parti d´a iconografía ofizial antifranquista, y a Puig Antich en un mito rebelde d´a progresía, mártir per a democrazia. A zinta "Salvador" en ye buen exemplo.

Unatro melitán d´o MIL, Oriol Solé Sugranyes, fuyó d´a garchola en 1978 chunto a más de 20 autibistas d´ETA(pm) y bels independentistas catalans en a conoxida como "Fuga de Segovia" pero fue asesinau per a guardia zebil en os mons de Nafarroa cuan ya yera amán d´a muga con Iparralde. En as garcholas de l´estau franzés i contina preso güe Jean Marc Rouillan, antigo autibista d´o MIL y dimpués d´a organizazión franzesa Action Directe, condenau a cadena perpetua

A particularidat d´a politica d´o MIL le balió as creticas y l´aislamiento de muitas d´as organizazions y partius marxistas-leninistas d´a epoca que les acusaban despeutibamén de "gangsters" u de "grupúsculo anarquista", prebando d´amagar que o MIL, igual como atras collas de planteyamientos parellanos en atros puestos de l´estau u d´Europa, amostraba unatro camín dende o marxismo que permitiba superar a dibisión istorica d´o mobimiento obrero entre marxistas y anarquistas per meyo d´una prautica reboluzionaria alazetada en l´auto-organizazión popular, l´asambleyarismo, l´autochestión y a formazión politica d´os treballadors, conceutos que güe son asumius per coleutibos y organizazions d´esferens tendenzias.

BIBLIOGRAFÍA, ARTICLOS E INFORMAZIÓN N´O RETE ARREDOL D´O MIL

-Tajuelo, Telesforo. El Movimiento Ibérico de Liberación, Salvador Puig Antich y los Grupos de Acción Revolucionaria Internacionalista: teoría y práctica, 1969-1976. París. Ruedo Ibérico, 1977. (Iste libro lo podez trobar en o Deposito d´a Biblioteca d´a carrera Dr. Cerrada)

-Rosés Cordovilla, Sergi. El MIL: una historia política. Barcelona. Alikornio, 2002.

-Téllez Solá, Antonio. El MIL y Puig Antich. Barcelona. Virus, 1994.

-Tolosa, Carlota. La torna de la torna: Salvador Puig Antich i el MIL. Barcelona. Empúries, 1999.

-Un esbozo de la historia del MIL. Sergi Roses: es.geocities.com/hbalance2000/elmil.htm -Entrebista a l´istoriador Sergi Roses sobre o MIL n´a rebista El Viejo Topo: www.barcelona.indymedia.org/newswire/display/274218/index.php

-www.paremoslapeliculasalvador.org

-www.salvadorpuigantich.info

0 comentarios