O Echerzito colonial ESPAÑOL pasea as suyas armas por meya Zaragoza

Fa dos añadas 1 melitar, tanimientres se feba o bamboso en un tanque con escolars puyaus enzima, murió en l’acurtelamiento de Monzalbarba, uno de tantos ixemenaus por a cheografía aragonesa; simién d’esbeniders miembros d’as fuerzas d’a guerra.

O 1 de Chunio se ba a zelebrar en Zaragoza o diya d’as Fuerzas Armadas españolas. Ba a estar una chornada probelizista empentada por os partius politicos que se dizen no biolentos y democratas, que antimás son empentando a istalazión d’una base d’a OTAN en Zaragoza. I partiziparán más de 3.000 efectibos y todas as suyas armas d’alta tecnolochía d’o tres echerzitos (10 cazabombarders, F1’s, Eurofighter, Harrier, Hércules, Elicopters,…). Cal remerar que a diya de güe l’aeropuerto de Zaragoza ye frenau en a suya expansión por a manca d’orarios con seguridat debiu a las maniobras d’istos abions .

As chornadas no se reduzen a un diya, sino que se i adibe una semana d’actibidaz a zaguers de Mayo con enchaquia d’o sanguinario y populista bizentenario d’a Guerra d’a Independenzia (en a que se contrimostró lo sanselo y ipocrita d’una enrestida melitar, que en iste caso estió refusada por un echerzito popular). Atra d’as enchaquias por las que se ha dezidiu de zelebrar iste diya en Aragón –no se i feba dende 1982- ye o desembolique d’a EXPO en Zaragoza y asinas “puyar lo maximo ista ziudat que tiene una binculazión tradizional con as Fuerzas Armadas”. Entre as actibidaz a fer a semana d’antis destaca tamién una chura de bandera popular (no se que de popular puede tener a chura enta un siñal imposau durante sieglos) y un omenache con puyada  d’o siñal colonial español.

Cal remerar que con a EXPO bels dos mil melitars colaborarán con os cuerpos de represión de l’Estau: Polizía nazional, Local y Guardia Zebil con a sincusa d’a seguridat. No contentos con explotar y ocupar o territorio dimpués de 300 añadas, o echerzito español tiene ocupau o 33% d’o termino monezipal de Zaragoza. Tot isto se debe a furtos y expropiazions con operazions como a “operazión cuarteles” en as añadas 70, que balió ta esfer-se de cuartels zentricos de ziudaz como Zaragoza u Samianigo,…u d’atros que no feba serbir ta endeudar a os conzellos a costa de l’echerzito español. Antimás a cambio modificaría os emplegos de grans extensions rusticas como o campo de maniobras de San Gregorio que pasaría d’unas 4000 ha dica más de 33.000; uno d’os mayors peligros a’l canto d’o puesto poblau más gran d’a redoladoda pero que ta os partius “democratas” y “no biolentos” no costituye garra problema.

Dimpués plegarían “Bal d’espartera”, “La Merced” en Uesca, “Ricardos” en Balbastro, “Caudé” en Teruel… y tampoco no cal xublidar que o echerzito aprobeitó as dictaduras de Primo de Rivera y Franco ta obtener una gran expansión d’o territorio melitar. Asinas como a embaxada melitar española en Aragón, con nombre d’Academia General melitar, que dica fa poco teneba encara a estatua ecuestre d’o suyo fundador en o branquil; tot con zesions de baldes d’os conzellos, infimos logers, prozesos expropiatorios u permutas desfaborables enta os conzellos.

En as notas de prensa nimbiadas dende a maquinaria de represión de l’Estau dizen que Zaragoza tiene “un exzelén presén y esbenidero”; ya que seguntes a modernizazión de l’Echerzito o numero d’efectibos presens en Zaragoza se quiere fer puyar un 24 por zién.

Un echerzito, o español, de naturaleza golpista que estió a punto de forzar atro golpe d’estau a trabiés de belunos d’os suyos chenerals con enchaquia de l’Estatut de Catalunya u a Lei d’a Memoria istorica. Abría estau unatro más dentro d’a gran cantidat que en ha abiu en as zaguers 250 añadas; y Aragón, de nuebas, zentro d’atra guerra Zebil.

En Aragón no podemos aconortar-nos con continar mantenendo a una crica de biolentos y golpistas. Dende l’independentismo aragonés no podemos tolerar más a sumisión enta l’echerzito español y a guerra. Se ha a menister que tot lo mundo sepa d’a situazión d’Aragón, dominada de tot por un echerzito que partizipa en masacres, empenta a biolenzia y fa creyar una industria d’a muerte a o suyo redol. No podemos tolerar que os politicos d’os partius en o poder puedan faborexer a l’echerzito d’a muerte sin garra consecuenzia.

Por ixo femos un clamamiento ta o diya 1 de Chunio y os anteriors, ta que todas y toz acudamos enta las actibidaz organizadas en refuse d’ista mena d’actos en Aragón; y en espezial a la de l’1 de Chunio a las 12 en l’abda Goya.

 

Entalto Aragón libre y socialista!

 

A Enrestida!!