De borina

O millor d’o hardcore euskaldún en Hondarribia

O biernes 7 podiemos asistir a uno d’os conziertos más esperaus d’o cabo berano. En meyo d’as fiestas d’o lugar; o puesto yera Hondarribia, un lugar d’o que ya emos charrau en atros articlos y cuyo prenzipal intrés, antiparti d'o polidismo lugar en a bahía d'o Txingudi, ye a cantidat de collas de hardcore que en surten y en han surtiu. Estiaño o siello “Psilocybe” tornaba a montar conziertos, d’una traza alternatiba a la programazión ofizial, fendo serbir un eszenario propio a’l canto d’as txoznas . Ta la chen que desconoxca ista mena de siellos mosicals dizir que surtió como una respuesta independién a la manca de refirmes y cobertura ta la cantidat de bandas que ban surtindo en Hondarribia y Euskal Herria, muitas d’ellas chicorronas. A propuesta ye esclatera y o suyo treballo ya se dixa beyer con bels prochectos d’apaño de locals ta ensayo, sala de conziertos,  programazions d’actuazions, discos,… siempre con o lema de “Mercau libre” por debán de tot.

As collas encargadas de tañer-ie yeran de sobras conoxidas por os asistens. Lisabö que feba poco eban sacau un disco autoproduziu, una d’as collas punteras en o hardcore d’a ripera d’o Bidasoa, con una puesta en eszena y un directo que fa tremolar o esmo de bez que o tuyo cuerpo.

A segunda colla yera ya un clasico d’os eszenarios hardocores que tamién feba poco eban sacau disco nuebo, ista begada sí, produziu por o siello “Psilocybe”. Un ritmo más lento que en os zaguers discos, pero de bez más denso y arroclador.

Cantas en un eskera con un platero sentiu rebindicatibo; una canta dedicada a “Nafarroa”, tot un chilo pleno d’intenzions en un lugar como Hondarribia que fue o puerto de l’antigo Reino de Navarra, cuna de l’actual Euskal Herria: “gu gerade Nafarroa” (en o dialecto nafarrera nusotros somos Nabarra).

A fiesta remató luego, malas que remató o conzierto. O diya benién sería o turno de tradizions mui luens d’o rock’n roll, y que en a mía opinión fan mala aduya a la combibenzia. O “Alarde” de Hondarribia, an que partizipan más de meya población,  ye añada par d’atra orichen de muitos conflictos que uno ya no sabe ni de an bienen.

L'asturiano empenta

O berano da ta muito, y una d’as cosas que se pueden fer ye biachar y conoxer a reyalidat d’atros países, muitas begadas amagadas por a maquinaria de l’Estau. Ista begada fuemos ta Asturias, un país chirmán a o nuestro con una d’as luengas más parexidas a la nuestra que nos podemos trobar en l’Estau, más que más por l’emplego cutiano d’o caracteristico berbo “ser” en a suya terzera persona, pero tamién por atros muitos rasgos d’o lexico.

Podríanos dizir que a situazión legal de l’asturiano ye un trango por debán de l’aragonés, debiu a o suyo reconoximiento y empente por parte d’o gobierno; pero en a mesma situazión de alegalidat ya que encara no goza d’un status de coofizialidat como le cal a cualsiquier luenga minorizada de l’Estau español.

A situazión sozial tamién diremos que ye por debán de l’aragonés ya que en a practica totalidat d’Asturias ye reconoxiu sin bergüeña como a segunda luenga d’Asturias, sino a primera, cuasi tot lo mundo la entiende y fan un poder por emplegar-la siempre; encara que muitas begadas entiendan por fablar asturiano dizir “ye”, fer as rematanzas de “as” en “es” y bel cambeo de posizión d’os pronombre arredol d’o berbo. Con tot y con ixo te truca o ficazio sentir a bitalidat que tienen toz istos rasgos en ziudaz tan grans como Ovieu u as industrials Xixón y Avilés.

A foto que tos meto perteneix a o concurso de canta asturiana en o preto d’o casco biello de Xixón, un domingo de metat de berano. O curioso no ye que se i zelebre o concurso de canto, que a begadas me remeraba muito a las xotas en a plaza d’o Pilar; sino que entre canta y canta bi eba representazions de teyatro comico asturiano y en asturiano, con recreyazions de situazions cutianas entre personaches. A plaza yera plena a rebutir y a chen se i sentiban identificaus con o parlache, esmelicando-se y fendo asabelo de comentarios.

En Echo en aragonés

Estiaño yera l’onzeno que se feba o PIR, iste festibal que se mira d’arroclar as difirens culturals pirinencas, cada añada en una d’as tres bals Oczidentals d’Aragón. 

O cabo de semana dende o 6 dica o 8 de Chulio preneba as carreras d’Echo ta meter-bi o suyo Mercau d’Artesanía y productos tipicos, pasabillas, actuazions y, prou que sí, borina. No ye que a resta de lugars no tiengan bida, pero en Echo nomás que bi plegas alufras un ambién diferén d’un lugar que tiene bel millar de abitadors y que l’ampla mayoría charran aragonés cheso.

O festibal se desembolicó con muito ambién y chen, os pasabillas enfuelgón as carreras y callizos d’Echo; benius dende oczitania “Boha Qui Pot”, Euskal Herria “Arroitu Indarra” de Roncal y prou que sí d’Aragón, con una d’as millors collas d’animazión meyebal de o momento: “Lurte”.

Tallers de zeramica u percusión tradizional, documental y presentazión sobre Janovas; y muitos conziertos ta bailar y ascuitar. Dende a mía ambista bi destacón os catalans de “La coixinera” que empentón a tot lo Pir a bailar, u “El Kapel” con o suyo mestizache folk-reggea d’o biernes,....

Ta rematar o domingo de tardis un clasico en o PIR, con dos collas que atamás de estar bien conoxidas por toda la chen d’Aragón y d’o PIR continan sorprendendo y esluzernando: La Ronda de Boltaña y la Val d’Echo.

Ista zaguera ye tot un siñal d’argüello y cultura ta la poblazión chesa, y dende o mío punto de bista una colla siñalera de toz as/os que charramos aragonés. Os Pepe Lera y Lagraba’s lideran un colla do l’aragonés cheso ye ferramienta prenzipal, cantas con una letra que charran d’aimor, os dreitos d’a muller muller, triballo u tradizions paganas como as “broxas”. Soi seguro que si ista mesma colla cantase en castellano y d’a birchen d’o Pilar ya l’abrían lebau por tot Aragón como siñal d’a nuestra cultura. Pero no, ixa ye a cruda reyalidat, o desconoximiento de gran parti d’os aragoneses d’una reyalidat sozial que ye platera en lugars como Echo y en un festibal como o PIR. Astí te puedes trobar a artesanos de toda mena que te charrarán en aragonés: benius dende a Sierra de Guara, suministradors de licors d’a propia bal... chen de Chistau que añada par d’atra deziden de besitar l’atras bals menos amanadas d’o Sobrarbe do charran a suya mesma luenga, u mesmo trobar-te de borina a una crica de crapulas chesos con os que te podrás esmelicar en aragonés... y Echo, do pues fablar-le a una zarracatralla de ninos en aragonés sin dengún problema ni sorporesa, do pues mercar cualsiquier cosa en aragonés y do pues beyer uno d’os zaguers puestos an que a trasmisión chenerazional de l’aragonés contina bien biba y os pais fablan a os suyos fillos en aragonés cheso sin garra bergüeña.

Encara no ye tot perdiu (Franja Rock’07)

Cuan encara creyébanos que tot ye perdiu, que a chobentut aragonesa ye malmesa por a globalizazión, más que más en os lugars, an que encara ye más difízil fer bella cosa diferén a lo que te imposan,... pos astí nos trobamos con Pena-roja (o Matarranya) y o Franja Rock.

O 31 de Marzo se tornó a fer a ya setena edizión d’o Franja Rock, que antimás de contar con buenas collas de rock se mira cada añada de creyar a o suyo redol un ambién cultural, estiaño sería un zinefórum y a I Trobada de dolzainers de Pena-roja. En ista zaguera i partiziparían collas de lugars de toda la redolada, sabendo que ista comarca ye posada en un puesto estratechico amanau a lugars de Teruel, Tarragona y Castellón. Cada lugar portaría un cartel con o suyo nombre y, prou que sí, a colla de Pena-roja, do paix que os ninos aprenden antis a tocar a donzaina que a parlar a suya luenga materna, o catalán. Bels chobens animaban dende o microfono, a las diferens collas que las irían puntuando y a la chen, con bailes tipicos. Prou que o catalán no sería en garra momento a gran muga que belunos fan creyer, tanto con Tarragona y Castellón, como con Aragón.

A organizazión yera perfecta y un “catering” yera guisando tanimientres a gran zena ta todas as collas i combidadas, as tradizionals y as rockeras.

En o salón de fiestas d’o lugar prenzipión os coleutibos a parar as suyas distribuideras: chen benida dende Vilafranca del Penedés, Zaragoza, Alcañiz u a Codonyera. Toz ellos con muitas ganas de paroliar sobre as zagueras esperienzias, nuebos proyeutos, y a gran pregunta de cuasi toz os “Franja Rock” ¿Pero tos sentiz catalans u aragonesos?

Cuasi siempre con charradas en catalán u mesmo en Aragonés, pero con un sentimiento mutuo de chirmandat de fer-se respeutar a dezisión d’os lugars d’a Francha oriental d’Aragón, a tamás de pobres exzepzions.... y, prou que sí, sin consentir a imposizión cultural de l’Estau español.

A meya nuei prenzipiaría l’esperau conzierto rockero. En primeras con un biello conoxiu d’A Enrestida: Cesk Freixas con o suyo repertorio en solitario y agradexindo a toda la chen d’Aragón a suya rasmia. Dimpués i tañería a colla rock d’a redolada Baxo Aragonesa: Komando Ramone, con un rock clasico; ta continar con a banda catalana “Kamarada Kalasnikov” dende o Penedés que empliría de goi as orellas de toz os que nunca antis no l’ebanos sentiu. Colla “rockera” con apuntes “Oi” y una combinazión nobedosa con donzainas catalanas.

Cuan o conzierto remató as mesas d’os coleutibos, as collas mosicals, os asistens... y sobre tot os chobens d’o lugar de Pena-roja rematón con una buena sensazión. A sensazión d’as cosas bien feitas ta poder continar atra añada, a prosima añada será a güeitena. Animo y entadebán!!

SAN FERMINS TXIKIS

Istas fiestas son l´enfuelgue de l´alde zaharra (casco biello) de Iruñea, an que toda la chen aspera mientres un año, igual como os San Fermins. Fiestas an que l´ambién festibo se mezcla con a rebindicazión, ista bez  yera por Palestina y o Libano con chen que eba meso una mesa an que se podeba siñar contra a ocupazion de Israel, en pro de l´ autodeterminazión de Euskal Herria con ikurriñas penchadas en todas as balconadas no dixando xublidar que Nafarroa ye l´epizentro de Euskal Herria, mesmo se beyeron bandieras republicanas de grans dimensións denzima de os tellaus de as biellas casas de l´alde zaharra u cartels que remeraban situazions de presxs politicxs.
A chen se embrecaba partizipando de maitins en pasacarreras de gaiters con chigans y "kilikis" lo que aqui son os cabezudos, con txistularis y dantzaris esnabesando a plaza de Nabarreria (an que todas as añadas gosamos beyer como un "guiri" remata en sulero), con rancho popular y como no l´internazional concurso de "goiti- beheras". Todas as añadas se zilebra o concurso mundial de goiti- beheras que consiste en artefautos caseros feitos de propio ta baxar por a costera de Santo Domingo an que salen os toros ta San Fermin. Partizipó chen de Iruña y  mesmo de difuera, beyemos chen en patins, en berdaderos "bowsleigs" con ruellos, asinas asinas. No sabemos qui estió lo ganador pero si sabemos lo bien que lo pasón toz y todas as partizipantes. Cal dizir que o recorriu ye mui bien parau y organizau con chen que cusira en tot l´inte que no esnabese o zircuito dengún , metendo pacas de palla por si un caso y con megafonía retransmitindo l´auto.
 Ya de tardes a fiesta se tornaba en mosica con autuazions en a Plaza de Nabarreria de orquestas que tañeban cantas populars como "no hay tregua" de Barricada, "Sarri, Sarri" de Kortatu y un largo ezetera. En atro puesto ,no guaire luen de iste zaguero, se trobaban as "txosnak" mesmo con una carpa an que de nueis tañería Buitraker y o biernes eban tocau el trono de judas.  No mancoron as rebindicazions con pancartas en pro de a luenga basca por parte de "Euskal Herrian Euskaraz " , asinas como pentadas y cartels en todas as paretes de o casco biello reclamando ofizialidat.

Fiestas con Istoria propia. O Zipotegato.

Encara que ya queda poquet ta rematar o berano iste cabo semana nos dezidiemos bels miembros de A Enrestida a ir ta una d’as fiestas con más tradizión y afluyenzia d’Aragón , O Zipotegato de Tarazona. Ista ziudat ye una d’as más polidas y de bez xublidadas. Con os suyos bels 11.000 abitadors beye como os diners de Zaragoza nunca ban t’astí y a begadas ye más fazil acudir enta os bezins d’a ribera Nabarra. Con tot y con ixo a ziudat cuenta con una larga trazión d’esfensa d’Aragón frente a os bezins Nabarros y Castellanos, en o suyo casco istorico se beyen as trazas que i dixón os chodigos, arabes y cristianos contrimostrando, de nuebas, o mezclallo cultural que dende fa muitos sieglos carauterizó Aragón.

As fiestas d’o Zipotegato son atro exemplo d’a sacralizazión d’as fiestas, un elemento pagano de tot que estió critianizau ta pasar a clamar-se as fiestas de San Atilano, que antismás se zilebraba en as primeras semanas de Otubre pero que como feba fredo y no bi iba chen se cambión enta o diya de San Agustín, o 27 d’Agosto, diya en que se zelebra dende alabez, encara que as fiestas continan clamando-se en onor a San Atilano.

Seguntes as istorias d’o lugar l’orichen d’o Zipotegato tiene dos bersions:

-Uno, cuan bi eba mazmorras y garcholas en os numeros palazios de Tarazona, un diya a la año dixaban escapar a uno d’os suyos presos condenaus a muerte, y si podeba esnabesar a muralla tanimientres le lanzaban zaborros os bezins sería libre.

-L’atro, y iste más creyible, deribó d’o elemente pagano d’o Zipotegato, mui común tamién en atros lugars d’a redolada de Borja y Tarazona, que acompaña a palotiaus y ba contando os alcagüeteos y istorias d’os lugars. Con un trache de colors bibos y una bara con un cordel ta foter a os ninos.

O Zipotegato, trigau entre toz os bezins que s’han quiesto presentar a o sorteu, esliche o suyo camín dimpués de salir d’a Casa d’a Billa siempre acompañau d’os suyos compañers y esnabesará a toda la masa de chen tanimientres rezibe una plebia de tomates de toz os costaus. A fin d’o camín será una casa en o casco biello que tienga bella cosa que bier con a suya familia, a la fin rematará tornando en os brazos d’a suya cuadrilla de nuebas enta la plaza y se’n puyará ta la estatua d’o Zipotegato, ista begada ya sin tomates.

A fiesta a rematau tornando-se en a más gran d’o lugar y, como en muitos atros puestos, se i bibe tot lo diya en a carrera. Os bars sacan as barras t’a carrera do, un poquet ya menos plenos de tomate, se contina de borina dica que se puede. A pena ye l’inchustificable ambién de "maquineo" y "pastilleo" que se i creya, por atro costau que ya se fa lamentablemén tipico de muitas fiestas d’Aragón, que fa pensar que somos en o meyo d’una gran discoteca. Un ambién que poco combida a fer charrazos u rebindicar feitos ta una ziudat istoricamén plena de caziques y dominau por a ilesia. A poblazión se beye dixada por una apatía cuyo unico intrés en istas fiestas pasa por bosar a entrada d’o toros ta pasar una tardi de borina sin nian sisquiera entender-ne ta poder criticar-lo.

Como elemento positibo comentamos os conziertos de mosica punk que se zelebrón ixe mesmo sabado, prebio a o zipotegato, en una nabe okupada con bandas d’a redolada; chen como a que eba organizau "Irrazional Novallas"; a cada begada más numerosa poblazión que se bi intresa por l’aragonés u por a mosica tradizional que ha plegau ha creyar bella cambra d’aprendizache.

 

As fiestas d’o lugar pero con o lugar.

Herritxarran Andramaxak.(Los Andramaris para los del pueblo).

Dentro d’o nuestro chicot bloq ebanos dezidiu incluyir un alpartau an que no nomás se podesen escribir articlos d’opinión u de politica como tal. Ye un alpartau en que escribir as borinas y puestos que imos bisitando en as nuestras bacanzas u biaches de cabo semana, biaches en que conoxer a reyalidat d’atros lugars y pueblos.

Ista begada belunos d’os miembros de A Enrestida fuemos a pasar as fiestas de Ondarroa (Bizkaia), no yera la primera begada que i yeranos y como siempre nos ne trayemos un buen lametón de luita sozial y rebindicatiba d’uno d’os lugars más euskalduns y combatibos d’Euskal Herria.

A situazión d’o conzello d’iste poliu lugar d’as costa de Bizkaia yera mayoría ta os conzelleros de Batasuna en as zagueras elezions, cosa que cambió fa 3 años cuan por meyo d’a lei de partius s’ilegalizó a ista formazión. A situazión d’o conzello cambió de raso cuan se tornón a repartir os puestos de conzelleros y o siguién partiu más botau, PNV, pasó a tener en as suyas mans o conzello. O lugar se puede beyer pleno de cartels an que os coleutibos chobenils claman "Lapurrak (ladrones)" a toz ixos conzelleros, incluyiu o PP que nunca antis no eba teniu representazión en o lugar, que han conseguiu o suyo puesto dimpués d’a Lei de Partius.

Dende que a color d’o conzello cambio toz os recursos que iban destinaus ta la chobenalla, fiestas, y demás… dixón de ir-ie y as fiestas d’o lugar, an que toda la chobentú i son implicaus, se beye que no les fa mica goyo a o nuebo conzello: o retallo presupuestario ta os conziertos, a manca de fazilidaz en as istalazions d’o conzello y mesmo a escoscadura d’a plaza an que son as "txoznas" ebidenzian tot isto.

Ta que a chen d’o lugar sabese lo que i yera pasando se creyó una plataforma informadera y alternatiba a las fiestas de "Andramaxak" en que son implicau toz os coleutibos de chobentut, pescadors, esportibos, culturals,… que quereban unas fiestas ta o lugar. Asinas ellos mesmos creyón o suyo programa de fiestas, cartels distribuyius por toda la redolada, conziertos,…. tamién cal adibir-ie o diya d’os chobens que se biene zelebrando dende fa bels años y que ye nomás organizau y finanziau por os coleutibos. Iste diya se distribuyón pañuelos, chambretas,… y material rebindicatibo antimás de chilos y cantas en a "kalejira" prebia a la chenta que ha feito que o lugar se torne en un puesto rebindicatibo ta recuperar as suyas fiestas, con o lema "Herritxarran Andramaxak". De seguras que poco tiempo tornarán a recuperar-las, tanimientres a nusatros nomás nos queda felizitar istas aizions que por desgrazia somos abezaus a padezer-las en os lugars y ziudaz d’Aragón. Aquí encara no tenemos a fuerza y o refirme sozial ta que se faiga sentir dende os conzellos u a resta d’a poblazión, beyer como os biellos d’o lugar se mercaban os pañuelos u as chambretas rebindicatibas ye un feito al que por agora no podemos aspirar en Aragón.