O capitalismo d’o BBVA contina explotando o treballador/a

Atra añada más pasó o diya d’o treballador. No ye que siga una tradizión sino que güe emos a menester, más que nunca, un diya en que luitar por os nuestros dreitos y contra o capitalismo. As interpresas y o capitalismo contina alimentando-se y creixendo a costa d’os treballadors; y os bancos, por muita obra sozial que quieran amostrar, obtienen unos benefizios netos cada añada mayors.

Fa bels meses surtiba a notizia de que o BBVA eba obteniu estiaño un resultau neto de 6.126 millons d’euros, un 29,4% más que l’añada pasada. Isto significa que o suyo esquimen a la ora ye similar a o salario añal de 31 treballadors.

Antimás Francisco González, presidén d’o banco multinazional, ¡¡demandó milloras fiscals ta enfrontinar o esbenidero!! y enantó que 2008 será una buena añada ta o banco.

González en garra inte reconoxió que bi ese crisis economica, sí “tensión finanziera”, pero trucó en o ficazio de que iste panorama negatibo se yera trasladando “enta a economía reyal y global”.

Con os datos en a man, a reyalidat combida a preguntar-se qui son os que son en crisis. Manimenos, con un benefizio economico d’o 29,4% en un inte d’estrapaluzio economico mundial, Francisco González reclamó ta o Gubierno español “midas fiscals” ta actibar a economía, bella cosa parellana a lo que ha pasau en Estaus Unius.

Os treballadors emos de creticar istos “benefizios economicos” y emos de considerar-los d’”inmorals”. Istos resultaus son obtenius con a practica cutiana d’a explotazión y emos de chilar que “un benefizio diyario de más de 16 millons no ye que un exemplo d’o capitalismo salbache. Un banco como o BBVA nomás s’alticama por a obtenzión de más y más benefizios” 

A destruczión d’o empleo en as suyas ofizinas, as masibas prolongazions de chornadas, que son oras extras encubiertas y defraudadas...Os suyos empleaus pierden poder adquisitibo diya par d’atro tanimientres ellos lo ganan.

A terzera parti d’ixe benefizio economico neto ye lograu en America d’o Sur, por meyo d’as suyas interpresas y fa poco se ha sabiu que o Tribunal d’os Pueblo chuzgará en Lima a o BBVA por “practicas delictibas”. En unas charradas que fa unos meses se podión sentir en Euskal Herria (an que dito banco tiene a suya siede), empentadas por os sendicatos no instituzionals y clamadas “BBVA: ladrones en el mundo globalizado”. Se dión a conoixer as actibidaz con as que o BBVA ha imposau un impacto negatibo sobre as poblazions an que opera directa u indirectamén.

Se le i acusó de empentar os conflictos belicos en o mundo con a finanziazión y partizipazión en interpresas armentisticas como: Cesce, Hispasar, Indra, Acio, Rimas u Gamesa (con Iberdrola),… Finanziazión d’a fabricazión de bombas de razimo por meyo d’interpresas como Raytheon, Thales y “Unión Española de Explosivos”. Ha mercau boluntaz politicas, como se contrimostró dimpués d’imbestigazions a o BBVA por as suyas cuentas en paraísos fiscals, influyenziando politicos y gubiernos ta la suya expansión en Latinoamérica. Entre 1999 y 2001 estió imbestigau por o FBI por o blanqueo de diners d’o narcotrafico. O Tribunal d’os Pueblos chuzga as suyas practicas antiumanitarias en Mexico por trancar cuentas d’as organizazions umanitarias en Enlace Civil y Osimech (Chiapas), a Comunidat d’a Paz de San José de Apartadó (Colombia), altas comisions por a trasferenzia de remesas u o desorbitau salario d’o suyo presidén,… entre atros. Se demanda a o BBVA que se comprometa a dixar beyer a suya trasparenzia y a o Estau español que asuma a suya responsabilidat.