¿Qué se edita, qué se bende, qué se compra qué se leye en Aragón?

Ya fa semanas que penchemos o extenso cartel con que estiaño a Biblioteca Frida Kahlo quereba empentar as lecturas disidens, y as suyas diferens siedes con as que cuenta dende fa bel par d’añadas: conziertos, lecturas, inaugurazions,… pero si i hai una fita que ye intresán de tot ye a rufierta que o sabado 16 se zelebrará en o Z.S.A. A Enrestida.

Y ye que dende iste mesmo blog y dende o nuestro colectibo siempre emos empentau a lectura, a nuestra siede ye un burguil de letras: fanzines, rebistas, libros,… pero en espezial material d’Aragón y en o suyo caso de bel tema disidén y/u reboluzionario.

Más de una begada emos charrau sobre os meyos aragoneses, as publicazions aragonesas,…. más que más por o suyo rispeto por a cultura aragonesa. Pero ista begada imos más tadebán y tos ufrimos una rufierta con representans d’as editorials más siñaleras que en istos intes son publicando lecturas aragonesas. A rufierta será antimás con autors y con os propios lectors que podrán preguntar lo que les pete.

Xordica, Eclipsados, Malavida, Troppo Editores, Nogará, … son belunas d’as editorials que más son publicando en zagueras. Prou que cadaguna con o suyo estilo u dende diferens ambistas. Dos d’ellas publican en aragonés y as atrás nomás en castellano; belunas pueden publicar bella bentena de libros a l’añada y atras s’aconortan con poder publicar-ne una dozena; y belunas leban una larga experenzia y atras más chobens prenzipian a dar os primers trangos con una nobela y bella rebista an que se incluye creyazión literaria y atros cheneros.

Tos combidamos a que i baigaz; en l’acto tamién bi abrá rifas de libros d’editorials alternatibas y aragonesas, de Santiago Alba; y antimás coleczions completas d’o periodico d’actualidat critica DIAGONAL. Y ta que colabores en l’autochestión d’a BFK traye un libro propio, dona-lo y te feremos entrega d’o carnet de sozio d’a Biblioteca. Ta poder amprar toz os libros que quieras en as suyas cuatro siedes.

www.birosta.com/bfk