Blogia
A Enrestida, diya par d'atro

Torna un nuebo Fendo Orella

 

Ya fa tres añadas de cuan una parella de chobens se presentaban en l’asambleya de Radio Topo ta demandar espazio ta fer un programa. En primeras no yera raro que unatro programa benise a demandar espazio en a Radio referenzia d’os mobimientos sozials de Zaragoza, pero a nobedat binió cuan se i presentó o programa y se dizió que iba a estar en Aragonés de tot. Yera la primer begada que isto se feba, encara que bi eba bel prezedén de programas con interbenzions en aragonés y, tal y como se nos dizió en a Radio, os estatutos contemplaban a posibilidat de fer serbir l’Aragonés.

As caras d’os asistens se tornón rarizas y pensatibas, yera comprensible más que más en una ziudat no guaire abezada a o bilingüismo. As retizenzias de belunos se tornón en preguntas de si iba estar de raso aragonés, si se iba a amostrar aragonés u no, que no se entendería, … o refirme de muitos d’os asistens y os estatutos yeran esclateros, Fendo Orella prenzipiaría en bellas semanas as emisions toz os Domingos de 17:00 a 18:00.

Os prenzipios estión plenos de nierbols, dandaleos,… abiemos d’aprender a manullar os siempre costosos mandos d’a Radio. Os primers programas contemos con a inestimable aduya de “Güevos Revueltos” y “Mambrú” en os mandos.

A partir d’alabez “L’aragonés” y l’independentismo tendrían boz en as ondas zaragozanas. Tamién más tardi la tendrían en Internet por a suya emisión en o rete…

Estiaño o prochecto ye nuebo, a mesmo idolochía pero mirando-nos d’esbiellar-nos con nuebas seczions, nuebas melodías, y mesmo una nueba boz femenina. Asperamos plegar enta nueba chen, y con os que ya i yeran, fixar un espazio an que toz podamos infornar-nos y ascuitar as bozes y opinions que, d’atra traza u en atro meyo, sería imposible de sentir. Tamién asperamos que as buestra sucherenzias, partizipazión en nuebos concursos u entrebistas contribuigan a amillorar-lo.

 

0 comentarios