CHARRADA PRESOS POLITICOS COLOMBIANOS
O zaguer sabado 10 de Febrero remataban as Segundas Chornadas Internazionalistas adedicadas a Colombia que se han feito durante a semana pasada en o Z.S.A. A Enrestida.
A fita trancaba con una charrada-rufierta que feba o Comité de Solidaridat con os Presos Politicos de Colombia, d’o cual i binión dos d’os suyos miembros esplicando-nos a grau situzión de biolazión de dreitos que de contino se da en ixe país.
Tamién se i proyeutó una zinta que fazió dita organizazión denunziando as torturas, as preturas d’as garcholas, o espezial seguimiento a presonas embrecadas en mobimientos politicos contrarios a l’estau u simplemén de carauter sozial y antimás abusos feitos por l’Estau y os suyos paramelitars. En a zinta podiemos beyer imachens reyals grabadas dentro d’as garcholas y testimonios de bellas bitimas enrestidas por l’exerzito, a polizía y os paramelitars d’estrema dreita.
Tamién nos i esplicón o punto an que se troba o conflito armau d’ixe país, que con aparienzia de domocrazia, fa serbir o terror y a fuerza ta fer desaparixer a la disidenzia y a la poblazión zebil muitas begadas no posizionada en garra postura d’a dos, y que lo fan beyer más fazil iste conflicto inbentando-se as denominazión de "narcoterrorismo", amagando y trafucando as suyas berdaderas causas.
Dimpués de resolber-nos bellas dudas se dio por rematada a charrada con a sensazión de conoxer más sobre ixe país.
Dimpués, se fazió una fiesta en refirme a istos pres@s politicos, se i sintió a mosica comlombiana, y se tastón bels platos tipicos compartindo con os compañers colombianos esperienzias y inquietuz.
Agradixer a colaborazión a o Comité de Solidaridat Internazionalista de Zaragoza y a o Comité de Solidaridat con os Presos Politicos de Colomiba sin os cuals nunca no podríanos aber feito ista trobada.
Liberazión u muerte. Benzeremos.
----------------------------------------------------------------------------------------------------------------------------------------------------
O biernes 9 de febrero se fazió, dentro d´as II Chornadas Internazionalistas, a charrada titolada "Colombia, entre el terrorismo de estado y el estado constitucional" feita per Francisco Palacios, profesor de Teoría de l´Estau y Dreito Constituzional en a Unibersidat de Zaragoza.
Seguntes mos i dizió, Colombia gosa definir-se como un estau democratico an que aparentemén trobamos as carauteristicas que permiten clamar-lo d´ista traza, como esleuzions y pluripartidismo, separazión de poders u mecanismos de guaranzia d´os dreitos indibiduals, pero en beras ye una democrazia nomás que formal. Baixo ixa aparenzia democratica s´amaga tot un tarabidau autoritario an que a bulneración d´os dreitos umans ye cutiana, y consecuenzia d´a represión estatal que preba d´aturar cualsiquier luita politico-sozial que se mire de rematar con a miseria que i preboca o capitalismo per meyo d´as politicas neoliberals d´os esferens gubiernos. Ista represión ha costau a bida a más de 30.000 personas en un periodo de tiempo parellano a o de atras dictaduras sí reconoxidas como tals, per exemplo lo Chile de Pinochet, con 3.000 asesinaus,
As oligarquías s´han repartiu o poder aplicando un bipartidismo liberal-conserbador turnando-sen en os gubiernos y güe o parlamento colombiano reflexa ixe bipartidismo, pos encara que i trobamos bels partíus, bi ha un bloque mayoritario amanau a o presidén Uribe (mesmo i existe un clamau "partido d´a U"y una oposizión que no´n ye y dentra n´o chuego, fueras d´un chiquet seutor clamau "Polo Democratico", que sin estar una fuerza de cucha sí que mantien binclos con seutors populars. L´abstenzión ye graniza, arredol d´un 55-60%, con que a lechitimidat d´Uribe ye chicorrona, ya que reyalmén tien un refirme popular d´un 20% alto u baxo d´a poblazión.
Istos gubiernos oligarquicos y autoritarios que han carauterizau o sieglo XX colombiano prebocaron a rispuesta d´os seutors sozials más consziens y debán a imposibilidat d´autuar dentro d´o marco institucional estatal dezidión de prener as armas y organizar o pueblo ta la toma d´o poder y a consecuzión d´un cambio reboluzionario. Naixioron asinas as prenzipals guerrillas, en 1964 as Fuerzas Armadas Revolucionarias (FARC), colla marxista-leninista clasica que autúa como un exerzito regular primando l´aizión melitar, y poco dimpués l´Ejército de Liberación Nacional (ELN), marxista amanau a posizions guevaristas y umanistas (muitos d´os suyos dirichens estioron moséns, como l´aragonés Manuel Perez) con una ambista más ampla y democratica d´a participazión popular en a luita reboluzionaria. Atras s´en creyón más tardi, como lo maoísta EPL (Ejército Popular de Liberación), el Movimiento Indígena Quintín Lame u o M-19. L´estau respondió a la insurchenzia con a creyazión de grupos paramelitars, que chunto con l´exerzito y a polizía son os causans d´a mayor parti de muertes dentre a poblazión zebil.
En os 80 as FARC siñón un alcuerdo con o gubierno ta declarar una tregua indefinida mientres o gubierno prenzipiara una serie de reformas politicas, economicas y sozials y estasen reconoxidas como un mobimiento con capazidat ta autuar a la luz publica con una fuerza politica legal. Se constituyó asinas a Unión Patriótica, pero en pocos años l´estau asesinó a 3.000 d´os suyos candidatos, melitans u representans y as FARC tornón a la luita armada. Manimenos en 1991 se produzió una desmobilizazión d´as organizazións guerrilleras más chicotas, M-19, EPL y Quintín Lame, a radiz d´a elaboración d´una nueba constituzión más abanzada y democratica, pero unatra begada la represión y a muerte estió a rispuesta de l´estau. Istos feitos tienen como consecuenzia que güe tanto FARC como ELN no contemplan a desmobilizazión incondizional, a tamas d´estar en negoziazións politicas con o gubierno d´Uribe, pos antis s´han de produzir cambios de raso en o tarabidau estatal.
As biolazions de dreitos umans masibas y sistematicas han estau denunciadas per organismos populars colombianos embrecaus en a esfensa de presos politicos y refuxiaus, per as prenzipals organizazións internazionals de dreitos umans (Amnistia Internacional, Human Right Watch), y mesmo per una instituzions mica sospeitosa de delera per a insurchenzia como l´Alto Comisionado de Naciones Unidas para los Derechos Humanos, siñalando en os suyos informes a o gubierno colombiano como complize d´o paramelitarismo y responsable d´a represión y d´a impunidat de l´exerzito y a polizía.
Cal para cuenta en todas istas cosas ta no cayer en a lochica de l´enemigo y no asumir como berdaz conzeutos que no se corresponden con a reyalidat. Colombia no ye una democrazia. I somos debán d´un estau d´exceuzión permanén. Y si dentramos en o discurso que mos bende o sistema de que en Latinoamérica bi ha democrazias (os estaus con gubiernos liberals) fren a dictaduras (Cuba, Venezuela, talmén Bolivia dentro d´un tiempo… sin cuestionar-nos que mena d´organizazión politica, sozial y economica bi ha dezaga d´ixas parolas somos dando a razón a ixe enemigo.
1 comentario
Elecciones -