A FUERZA Y O SUBCHETIBISMO D'AS EDITORIALS

A plegada de l'ibierno en países como lo nuestro fa que l'orario de sol s'achique y chunto con a fredor fa que nos combide a pasar más rato en casa nuestra u cubillaus baxo un teito. Ye ixe o tiempo cuan más ratet tenemos ta leyer un libro u beyer bel documental. Alabez ye cuan as cosas s'embolican, ¿Qué libro trigamos que nos faiga aprender luen d'o mundo mediatico y manipoliau?

Ista custión se complica prou en puestos como Aragón an que l'Heraldo d'Aragón, a suya distribuidera comerzial y o patrozinio d'Ibercaxa u CAI dixan pocas opzions ta la ochetibidat. Manimenos bi ha exzepzions que caldría comentar.

Sin poder-lo meter dentro d'os diyarios exemplars u como garra exemplo a prener, O periodico d'Aragón s'ha tornau en uno d'os unicos que no abanican a l'imperio de l'Heraldo d'Aragón ni d'a dreita españolista aragonesa. A suya serbidumbre a o PSOE u Chunta fa peligrar a mayor parti d'as begadas a suya berazidat pero con tot y con ixo a zaguera entrega d'a colezión a "Guerra Civil en Aragón" ye toda una contribuzión a l'istoria beraz d'os mobimientos sozials en Aragón. Cal parar cuenta que si no yes parti d'a elite inteleutual aragonesa, capitaniada en istos intes por Antón Castro, Mena u J.A. Labordeta, puede que te pase como a os autors de toda una alfaya de libro sobre a "Guerra Civil en Almudebar" u "Ejea 1936. La sombra de la guerra ", que tasamén han teniu repercusión en as criticas editorials d'os meyos controlaus.

Dende a decada d'os 80 a imachen d'Aragón dentro y en l'esterior ha estau dada por a editorial PRAMES que ye a clamada "eidtorial d'o Gubierno d'Aragón". Ha teniu que serbir a os suzesibos gubiernos que han pasau por a D.Ch.A. Y a tamas d'as suyas prebatinas por cudiar a toponimia tradizional, a suya esfensa por o meyo ambién y a no perder a cultura tradizional ha rematau colaborando con a editorial de HA en rebistas y adubindo-se a l'inestimable aduya que ya teneba d'a CAI.

Toda ista mena de aduyas a PRAMES fa que editorials que s'adedican a la mesma traza d'edizions, como a chazetana ed. Pirenarium, se'n quexen d'una esclatera competenzia desleyal. Manimenos a simplista ambista de Pirenarium en o que a toponimia, país y tradizión popular se diz le dixa mui luen d'as editorials bascas u catalanas con as que colabora en SUA y "El mundo de los Pirineos", fendo dixar difuera d'Aragón una imachen mui simplista y pobre. Ed. PIRINEO con a colezión de cartas y guidas ye contribuyindo a plenar ixe forau que por agora queda buedo en a produzión literaria.

Una d'as zagueras editorials encargadas d'una publicazión literaria en Aragón ha estau Xordica, unica en creyazión comerzial en aragonés. Ye una pena que a delera de Chusé R. Usón por a elite inteleutual (Tomeo, Labordeta) y as suyas barucas en "deschuntar" o mobimiento en esfensa de l'aragonés, l'aigan feito tornar-se en unatra editorial más.

Fa poco emos bisto surtir t'a carrera un nuebo Paper en Aragón, Diagonal. A esperenzia en a edizión estatal y a sochetibidat alternatiba con que i tratan os articlos nos fan prener-ie asperanzas. Asperemos no nos defrauden y a suya bida no siga fugaz.

Remataré charrando d'exemplos que territorios a'l canto d'o nuestro ban prenendo .Editorials como "Txalaparta" con bels 40 libros editaus a l'año, dignificando a istoria y cultura basca siempre con una endrezera bilingüe y colaborando con "Editores Independientes" ta guaranziar a dibersidat editorial; u "Farell" en Catalunya. Tamién con ista endrezera treballan as librerías ONA en Cataluña u ELKAR en EH. Iste treballo podría tener o espiello en Aragón con o Rolde d'Estudios Aragoneses, con una produzión editorial en temas aragoneses prou importán pero que ye supeditada a una continazión d'o camín ideolochico de CHA y d'o Consello d'a Fabla en temas lingüisticos; y a una imachen que se ha quedau acartonada dende os tiempos d'a rebista Ebro.

Unatro exemplo sería o de portals d'internet de contrainformazión local, como Glayiu, en terminos asturianistas que ha dau un brinco enta una nueba etapa editorial con un libro en asturiano charrando d'a reboluzión: "Carlos Marighella, el deber del revolucionariu".

Papers como "GARA" tiene una linea editorial de libros d'ambista internazionalista u istoria basca que queda mui luen d'os "Episodios nacionales" editaus en zagueras por HA, y mesmo a colezión de mapas y cursas que fa "GARA" chunto con SUA sobre Aragón no tiene cosa que bier con o poco rispeto a la toponimia y calidat d'as publicazions dominicals d'os papers aragoneses, fueras de PRAMES.

En o caso de documentals telebisibos asperaremos a que a CARTV dixe, y aduye a treballar a la chen que leba asabelo de tiempo recuperando a istoria popular aragonesa. Beyendo os documentals que ETB u TV3 han feito sobre a Guerra Zebil en os suyos territorios me quedo con a sensazión de que Aragón ha tornau a perder a oportunidat y a dignidat de parti d'a suya istoria amagada por o faxismo. Iste faxismo que fa que os aragoneses continen aconortaus en un españolismo asumiu.