Blogia
A Enrestida, diya par d'atro

AS DITRIBUIDERAS LIBRES CONTINAN EMPENTANDO

AS DITRIBUIDERAS LIBRES CONTINAN EMPENTANDO

Ya somos abezaus a que, mesmo en os ambiens más alternatibos, se prenga como común que collas de mosica partizipen u colaboren con distribuideras comerzials. A begadas paix que a unica traza de que sigas bien considerau en o mundo d’a mosica ye rilazionar-te con as altas esferas d’a mosica en Aragón. A poqueta chen que o zaguer sabado estiemos en o Zentro Zebico Bal de Fierro quedemos refirmaus en que a mosica de calidat no ye en baralla con lo no comerzial, ni en Aragón y en atro puestos.

Una d’as distribuideras más beteranas en isto d’a mosica libre, Mala Raza, y unatra que ha prenzipiau fa pocas añadas, Magofermín, yeran as encargadas d’a organizazión d’iste conzierto. A predisposizión d’a chen d’o Zentro a fer conziertos aduyó a organizar-lo, y ye que unas instalazions como las que i tienen no pueden estar malfurriadas. A begadas no conoxemos a cantidat d’espazios que bi ha en Aragón ta fer conziertos, encara que ya sabemos que o refuse a ista mena d’ebentos dende o Conzello de Zaragoza mete as cosas asabelo difízils. No sólo que ixo son as dificultaz con as que se troban a chen que organiza conziertos: SGAE, equipo de soniu, finanziazión y o luen an que se troban belunos d’istos zentros. Ista zaguera dificultat chunto a la cantidat d’ebentos que bi eba iste cabo semana en Zaragoza sería a la fin dezisibo ta que la chen no i acudise.

Prenzipió tañendo-ie BLOCKBASTARD con o suyo hardcore d’os güitanta, una d’as millors collas que de punk que en zagueras han saliu en Zaragoza. Plegaban d’arribar d’un conzierto en Barzelona y en o garganchón de "Hugo" se notaba. Pero con muitas ganas y unas cudiadas guitarras se quedón con o poco publico pero buenos seguidors que i acudión.

Dimpués bendría ULUT. Entre os corroldos de chen se sentiban as preguntas d’o por qué d’a poca asistenzia d’a chen. Una colla como ULUT que ye pionera en o hard-core en aragonés nos dixó esluzernaus con o suyo progreso, en breu tiempo ba a salir enta a carrera o suyo primer disco y asperemos que a lo menos a chen que esfiende a luengas minoritarias lo refirme. Chen que abría de salir d’o calaxo d’as gaitas y a mosica seudo-comerzial acudindo a ista mena de conziertos . Un proyeuto de colla que creba as mugas en Aragón.

Ya la fin d’o festibal bendría a colla estrela d’a nuei, os bascos FLYING SHIT dende Bergara. Astí no ye mica raro que o hard-core siga cantau en euskera, ye más, a cantidat de bandas de rock que’n salen nomás ye contimparable con países nordicos como Suezia u Alemania. Mesmo un zarpau de seguidors que bendrían a beyer-los serían a begadas más numerosa que a propia chen de Zaragoza. Un hard-core rapedo y contundén. O batería y o guitarra dixarían esclatero a calidat de collas como ista, sin garra refirme economico dezaga y una distribuzión alternatiba que les fa fer chiras y conziertos arribando mui luen d’o suyo lugar.

Prou que ista mena de distribuzión de mosica ha d’estar cada begada más importán en Aragón. L’atra ya la conoxemos y nomás ha feito que en Aragón s’aiga encasquillau dende fa tiempos a maquina de fer mosica y organizar conziertos.

Tanimientres tos recomendamos que tos pasez por as zentros d’as dos distribuideras que organizaban o conzierto:

-Mala Raza en C.S.A. 4.5.1

-MagoFermín en Z.S.A. A Enrestida.

0 comentarios